नेपालमा ३० हजार संक्रमित : थप ८३८ जनालाई कोरोना, ११ जनाको मृत्यु !

५ भदौ, काठमाडौं । नेपालमा थप ८३८ जनामा कोरोना भाइरसको संक्रमण पुष्टि भएको छ । यससँगै नेपालमा कोरोना सङ्क्रमितको सङ्ख्या ३० हजार नाघेको छ । थपिएका ८३८ संक्रमितले नेपालमा कोरोना संक्रमितको संख्या ३० हजार चार सय ८३ पुगेको हो ।

शुक्रबार १३ हजार पाँच सय ७९ जनाको पीसीआर परीक्षण गरिएको थियो । जसमा आठ सय ३८ जनामा सङ्क्रमण पुष्टि भएको हो । यस्तै शुक्रबार मात्रै दुई सय ५० जना कोरोना जितेर घर फर्किएका छन् । यससँगै नेपालमा कोरोना जित्नेको संख्या १८ हजार दुई सय १४ पुगेको छ ।

यस्तै गएको २४ घण्टामा ११ जनाको मृत्यु भएको छ । हिजो दिउँसोदेखि अहिलेसम्म ११ जनाको मृत्यु भएको हो । यससँगै कोरोनाले ज्यान गुमाउनेको संख्या १ सय ३७ पुगेको छ ।