चितवनमा मृत्यु भएका बृद्धमा कोरोना

६ भदौ, चितवन । उपचारका क्रममा चितवनमा मृत्यु भएका हेटौंडाकाका एक व्यक्तिमा कोरोना पुष्टि भएको छ । भदौ ३ गते निमोनिया भएर भरतपुरको पुरानो मेडिकल कलेजमा उपचारका लागि आएका ७५ वर्षीय एक वृद्धको विहीवार राति मृत्यु भएको थियो ।

उपचारका लागि आएलगत्तै उनको स्वाब संकलन गरी चितवन मेडिकल कलेजमा परीक्षणका लागि पठाइएको थियो । स्वाब परीक्षण गर्दा उनमा पोजेटिभ देखिएको छ । तर, चितवन मेडिकल कलेजको ल्याब हालै मात्रै स्थापना गरिएकाले त्यसको विश्वसनीयता परीक्षण गर्न बाँकी रहेकोले रिपोर्ट सार्वजनिक गरिएको थिएन ।

भरतपुर कोभिड ल्यावमा शुक्रबार राति गरिएको भेरिफिकेसन परीक्षणमासमेत उनको रिपोर्ट पोजेटिभ आएको छ । यससँगै चितवनमा अहिलेसम्म कोरोनाले पाँच जनाको मृत्यु भएको छ । चितवनका मात्रै तीन जनाको मृत्यु भएको हो ।