कपिलवस्तुमा भदौ १५ गतेसम्म निषेधाज्ञा जारी

७ भदौ, कपिलवस्तु । कोरोना संक्रमणको अवस्था बढ्दै गएपछि कपिलवस्तुमा जारी निषेधाज्ञा भदौ १५ गतेसम्मलाई थप गरिएको छ । जिल्ला कोरोना संकट व्यवस्थापन समिति डीसीसीएमसीको आइतबारको बैठकले थप ८ दिन निषेधाज्ञा थप गर्ने निर्णय गरेको हो ।

यो निर्णयअनुसार अब भदौ १५ गते राति १२ बजेसम्म निषेधाज्ञा जारी रहनेछ । प्रमुख जिल्ला अधिकारी दीर्घनारायण पौडेलका अनुसार यसअघि जारी गरिएको निषेधाज्ञा भदौ ७ सम्म थियो । बैठकले अत्यावश्यक बाहेकका सबै प्रकारका व्यवसाय सञ्चालन गर्न नदिने निर्णय गरेको छ ।

अति आवश्यकीय वस्तु ढुवानी, एम्बुलेन्स, शवबवहन र राजमार्ग भएर गुड्ने सवारी साधन जिल्लाभित्र चढ्न ओर्लन नपाउने गरी बाहेक सबै प्रकारका निजी र भाडाका सवारी साधन सञ्चालन नगर्ने निर्णय गरेको छ ।