सीटीहलको निर्माण अर्को महिनाबाट

१७ भदौ, चितवन । भरतपुर महानगरपालिकाको महत्वपूर्ण परियोजना सीटीहलको निर्माण आउँदो महिनाबाट थालिने भएको छ । भरतपुर महानगरपालिका–१० मा अत्याधुनिक सिटिहलको निर्माण गर्न लागिएको हो । सघन शहरी तथा भवन निर्माण आयोजना भरतपुरले सिटिहल निर्माणका लागि ठेकेदार छनौट प्रक्रिया अन्तिम चरणमा पुर्याएको छ ।

सीटीहल निर्माणका लागि आह्वान गरिएको बोलपत्रको प्राविधिक प्रस्ताव अनुमोदन भइसकेको छ । बोलपत्रमा १५ ठेकेदार कम्पनी सहभागी भएका थिए । तीमध्ये छनौटमा परेका पाँचवटा कम्पनीको आर्थिक प्रस्ताव मुल्याङ्कन गरी शहरी तथा भवन निर्माण विभागमा सोमबार पठाइएको आयोजना प्रमुख प्रकाश अर्यालले जानकारी दिए ।

विभागबाट अन्तिम स्वीकृत भएलगत्तै कामका लागि छनोट भएका ठेकेदार कम्पनीलाई एक साताको सूचना जारी गरेर दावी विरोध नभएमा १५ दिनभित्र बोलाएर काम शुरुआत गर्न लगाइने उहाँको भनाइ छ । यी सबै प्रक्रिया सम्पन्न गरी असोजबाट निर्माण शुरु गर्न सकिने भएको छ ।

सम्झौता मितिको २७ महिनाभित्र काम सम्पन्न गर्नुपर्ने हुन्छ । बोलपत्र रकम मूल्य अभिवृद्धि करबाहेक रु एक अर्ब छ करोडको रहेको छ । आर्थिक प्रस्ताव विभागबाट अनुमोदन भइनसकेकाले के कतिमा बोलपत्र सदर हुन्छ भन्ने बारेमा आयोजनाले नजनाए पनि लागत अनुमानभन्दा कममा बोलपत्र प्रस्ताव गरिएको जनाइएको छ ।

भरतपुर महानगरको गौरवको रूपमा सभाहललाई लिइएको छ । चार बिघा जमिनमा निर्माण गर्न लागिएको सभाहलमा मुख्य अडिटोरियम ब्लकमा दुई हजार जना अट्ने सुविधासम्पन्न सभाहल हुनेछ । सँगै ३०० क्षमताको कन्फरेन्स हल रहने छ भने विशिष्ट व्यक्तिका लागि छुट्टै कक्ष हुने अर्यालले जानकारी दिए । चारवटा भर्याङ्ग, प्रवेशद्वार, आकर्षक स्टेज, रिहर्सल कक्ष रहने छन् । मुख्य ब्लक सात हजार वर्गमिटरमा फैलिएको उनको भनाइ छ ।

“मुख्य ब्लक मात्र एक बिघा क्षेत्रफलमा फैलिएको छ ।” सिटिहल परिसरमा दुई पाङ्ग्रे ३१७ वटा र चार पाङ्ग्रे ६७ वटा गाडी अट्ने क्षमता रहने छ । त्यस्तै विशिष्ट व्यक्तिहरुका सात वटा सवारी अट्ने छुट्टै पार्किङ हुने अर्यालले जानकारी दिए । हाल नेपालमा यति क्षमताको संञ्चालनमा रहेको सभाकक्ष छैन । अर्यालले भने, “नेपाली शैलीमा बन्ने भए पनि उच्चस्तरीय सामग्रीहरु प्रयोग गरी अत्याधुनिक बनाइने छ ।”

भरतपुर महानगर प्रमुख रेनु दाहाल निर्वाचित भएदेखि नै सभाहलका लागि जुट्नु भएको हो । दाहालले भने, “पहिले त जग्गा पाउनै मुस्किल भयो, जग्गा पाएपछि सम्पूर्ण प्रक्रिया पूरा गर्न समय लाग्यो ।” दाहालले भदौ अन्तिम साताबाट काम थाल्ने तयारी गरेको भए पनि आसोज लाग्न सक्ने बताए । उनले थपे “यो महानगरको सान हुने छ ।”

यसले स्वदेश र विदेशमा चिनाउने उनको विश्वास छ । अत्याधुनिक र सुविधासम्पन्न हुने भएकाले राष्ट्रिय तथा अन्तर्राष्ट्रिय सभा सम्मेलन गर्न सहज हुने दाहालको भनाइ छ ।