जडीवुटीका बारे भ्रम फैलाएको भन्दै आयुर्वेद चिकित्सक संघको आपत्ति

१८ भदौ, काठमाडौं । कोरोना महामारीका बीच आयुर्वेद जडीवुटीका नाममा भ्रम फैलाएको भन्दै नेपाल आयुर्वेद चिकित्सक संघले आपत्ति जनाएको छ । केही युट्युब च्यानल तथा अनलाइन पत्रिकामा आयुर्बेद चिकित्सा नपढेका, परिषद्मा दर्ता नभएका तर गैह्र कानुनी रुपमा आफ्नो नामको अघि डा. लेखेर आयुर्वेद चिकित्सक  हुँ भनी जनमानसमा भ्रम फैलाएको भन्दै संघले आपत्ति जनाएको हो ।

संघका अध्यक्ष डा. प्रकाश ज्ञवालीले भ्रम फैलाउने कामप्रति आपत्ति जनाउदै विज्ञप्ति निकालेका हुन् । विज्ञप्तिमा बीपी तिमिल्सिना, पूर्ण शाही, बद्री गौतम लगायतका व्यक्ति आयुर्वेद तथा प्राकृतिक चिकित्सक नरहेको र काउन्सिलमा दर्ता समेत नभएको तथा आयुर्वेद चिकित्सालाई समेत बद्नाम गराउन उद्दत रहेको हुँदा त्यस्ता व्यक्तिको भ्रममा नपर्न आग्रह गरिएको छ ।

आयुर्बेद चिकित्सक बन्न विज्ञान विषयमा चिकित्सा प्रमाणपत्र तह उत्तीर्ण गरेकाे हुनुपर्छ । साथै उक्त व्यक्ति नेपाल आयुर्वेद चिकित्सा परिषद नेपालमा दर्ता भएको हुनुपर्दछ । तर आफू आयुर्वेद चिकित्सक हुँ भन्दै गल्ती गर्ने र आयुर्वेद चिकित्सकको बदनाम गर्ने उपर तत्काल कारबाही गर्न संघले सरकार समक्ष माग गरेकाे छ ।