सप्तरीका थप दुई संक्रमितको मृत्यु, मृतक संख्या आठ पुग्यो

◊ धीरुभाइ

१८ भदौ, सप्तरी । सप्तरीको राजविराजका थप दुई कोरोना भाइरस संक्रमित पुरुषको बिहीबार मृत्यु भएको छ । जिल्लाको राजविराज नगरपालिका वार्ड नम्बर ७ का दुई जनाको बीपी कोइराला स्वास्थ्य विज्ञान प्रतिष्ठान धरानमा उपचारको क्रममा मृत्यु भएको छ । राजविराज–७ का ५५ वर्षीय पुरुषको बिहीबार दिउँसो १ः१५ बजे र ५० वर्षीय पुरुषको दिउँसो २ः२ मिनेटमा मृत्यु भएको प्रतिष्ठानका प्रवक्ता डा. निदेश सापकोटाले जानकारी दिए ।

राजविराज स्थित छिन्नमस्ता अस्पतालबाट रिफर भई भदौ ४ गते बीपीमा भर्ना भएका ५५ वर्षीय पुरुषमा भदौ ७ गते कोरोना सक्रमण पुष्टि भएको थियो । रक्तअल्पता र मधुमेहको समस्याबाट ग्रसित पुरुषलाई भदौ ८ गतेदेखि आइसीयूमा राखेर उपचार गरिएको थियो ।

यसैगरी राजविराज–७ कै ५० वर्षीय अर्का पुरुषलाई श्वासप्रश्वास लगायतको समस्या देखिएपछि बिहीबार प्रतिष्ठानको आकस्मिक कक्षमा भर्ना गरिएको थियो । स्वाब संकलन गरी परीक्षण गर्दा कोरोना सक्रमण पुष्टि भएको हो । दिउँसो १ः२० मा भर्ना गरिएको ४२ मिनेटपछि उनको मृत्यु भएको प्रतिष्ठानका प्रवक्ता सापकोटाले बताए ।

मृतक दुवै जनाको शव व्यस्थापन नियमानुसार हुने तयारी भइरहेको बताइएको छ । योसँगै जिल्लामा मृतक संख्या आठ पुगेको छ ।