सहयोद्धाको अभियानले ७२ जनाको नमूना स्वाब संकलन

◊ धीरुभाइ

२१ भदौ, सप्तरी । सप्तरीको राजविराजमा सहयोद्धा संस्थाले एक घर एक पीसीआर अभियान अन्तर्गत ७२ जनाको स्वाब संकलन गरेको छ । राजविराज नगरपालिका वार्ड नम्बर २ का ७२ घरपरिवारका ७२ जनाको स्वाब संकलन गरिएको संस्थाका अध्यक्ष रबिन्द्र यादवले बताए ।

पीसीआर परीक्षणको लागि उनीहरुको नमूना स्वाब संकलन गरिएको उनले बताए । यस अभियान अन्तर्गत शनिबार वडा नम्बर २ स्थित राजदेवी विद्यालयमा गरिएको पीसीआर परिक्षण दिउँसो ४ बजे देखि सुरु भएको संस्थाका सचिव प्रतिष्ठा यादवले जानकरी गराए । एक घरबाट कम्तिमा एक जनाको परीक्षण गर्ने उद्देश्यले संचालित कार्यक्रममा ७२ घरबाट ७२ नमुना स्वाब संकलन गरिएको उनले बताए ।

कार्यक्रम संयोजक अमर मण्डलको संयोजकत्मा आयोजित अभियानको गजेन्द्र नारायण सिंह अस्पतालका निमित मेडिकल सुपरिटेन्डेन्ट डा. रणजीतकुमार झाले शुभारम्भ गरेका थिए । कार्यक्रममा नमूना स्वाब दिन आएका स्थानीयवासीसँग सामाजिक दूरीका साथ मास्कको प्रयोग अनिवार्य गरिएको थियो ।

आयोजक संस्थालाई स्थानीय राजदेवी युथ क्लब र वडा नम्बर २ का जनप्रतिनिधिले पनि सहयोग गरेका थिए । कोरोना महामारीले आक्रान्त भएको बेला सहयोद्धाले समुदायमा यसको थप संक्रमण फैलिन नदिन यस्तो अभियान थालेको सहसचिव सत्यम यादवले बताए ।

गत आइतबारदेखि राजविराज नगरपालिकालाई क्षेत्र बनाई सुरु गरिएको अभियान अन्तर्गत वडा नं. ८ मा पहिलो चरणको कार्यक्रम गरिएको थियो । सो वार्डमा ६८ घरका ६८ जनाको नमूना स्वाब संकलन गरिएको थियो ।