अर्घाखाँचीका संक्रमितको कोहलपुरमा मृत्यु

२३ भदौं, काठमाडौं । उपचारका क्रममा अर्घाखाँचीका कोरोना संक्रमित पुरुषको बाँकेको कोहलपुरमा मृत्यु भएको छ । अर्घाखाँचकिो सितगंगा नगरपालिका १२ का ४२ वर्षीय पुरुषको मंगलबार बिहान उपचारकै क्रममा नेपालगञ्ज मेडिकल कलेज शिक्षण अस्पताल कोहोलपुरमा मृत्यु भएको हो ।

मृतक भदौ ११ गते कोहलपुरस्थित शिक्षण अस्पतालमा गम्भीर अवस्थामा भर्ना भएका थिए । भेन्टिलेटरमा राखेर उपचार गर्दा केही सुधार भए पनि मंगलबार उनको मृत्यु भएको हो । मृतक साउन २७ गते टिपर दुर्घटनामा गम्भीर घाइते भएपछि उपचारका लागि भैरहवाको युनिभर्सल मेडिकल कलेजमा भर्ना भएका थिए ।

दायाँ करङ् र नाडी भाँचिएका उनको १४ दिनपछि अप्रेसन गर्नुअघि पीसीआर परीक्षण गर्दा रिपोर्ट पोजेटिभ आएको थियो । त्यसपछि उनी भैरहवाकै भीम अस्पतालमा रिफर भएका थिए । उपचारकै क्रममा उनको कोहलपुरमा मृत्यु भएको हो ।