सिन्धुपाल्चोकमा तत्काल बस्ती नसारे झन ठूलो क्षति हुन्छ : देउवा

२८ भदौ, काठमाडौं । नेपाली काग्रेसका सभापति शेरबहादुर देउवाले सिन्धुपाल्चोकका जोखिमयुक्त बस्ती सार्न माग गरेका छन् । आइतबार एक प्रेस विज्ञप्ति निकाल्दै सभापति देउवाले सिन्धुपाल्चोकको बाह्रबिसेमा गएको पहिरोमा परेर मृत्यु भएकाप्रति श्रद्धाञ्जली व्यक्त गर्दै तत्काल अरु जोखिमयुक्त बस्ती नसारे झन ठूलो क्षति पुग्ने बताएका हुन् ।

साथै देउवाले बाह्रबिसे पहिरोमा पुरिएकाको खोजी गर्न, घाइतेहरुलाई उपचारको प्रबन्ध गर्न तथा पीडितका परिवारलाई अति आवश्यक सामग्रीहरु खाद्यान्न लत्ता कपडा भाँडाकुँडा औषधी र अस्थायी बसोबासको व्यवस्था गर्न पनि माग गरेका छन् । बाह्रबिसे पहिरोमा आइतबार दिउँसोसम्म ९ जनाको मृत्यु भएको पुष्टि भएको छ । अरु २२ जना घाइते छन् ।

सिन्धुपाल्चोकमा यस बर्षामा गएको यो तेस्रो पहिरो हो । यसअघि सिन्धुपाल्चोक बाह्रेबिसेमा पहिरो गएको थियो भने त्यसपछि केही हप्ता अगाडी लिदीमा पनि पहिरो गएको थियो । अहिले फेरि बाह्रेबिसेकै अर्को ठाउँमा पहिरो गएको हो ।