बन्दाबन्दीमा प्रहरीको सक्रियता बढ्यो

३१ भदौ, स्याङ्जा ।  कोरोना भाइरस संक्रमण फैलिन नदिन सरकारले गरेको बन्दाबन्दीका बेला अपराधिक क्रियाकलाप बढ्न थालेपछि स्याङ्जामा प्रहरीले सक्रियता बढाएको छ । चोरी शिकारी देखि जुवातास खेल्ने क्रम बढेपछि प्रहरीले अपराधिक क्रियाकलाप न्युनिकरण गर्न सक्रियता बढाएको हो ।

प्रहरीले एक सातामा भरुवा बन्दुक सहित बाघको जस्तो देखिने हड्डी देखि गाँजा सप्लाई तथा सेवन कर्ताहरु पक्राउ गरेको छ । जिल्ला प्रहरी कार्यालय स्याङ्जाले पुतलीबजार नगरपालिका ७ मोहरीया बस्ने बर्ष ६९ को भिमबहादुर ठकुरी र सोही ठाँउका ६० बर्षिय ओमबहादुर हमाललाई एक नाले ४ थान भरुवा बन्दुक सहित पक्राउ गरेको छ ।

ठकुरीको घरबाट इजाजत नभएको १ नाले भरुवा बन्दु एक थान, १ नाले १२ बोरको बन्दुक १ थान सहित बन्दुकमा प्रयोग हुने सामाग्री र हमालको घरबाट इजाजत नभएको एक नाले भरुवा बन्दुक २ थान सहित बन्दुकमा प्रयोग हुने सामाग्री सहित नियन्त्रणमा लिएर अनुसन्धान भइरहेको जिल्ला प्रहरी कार्यालयका प्रवक्ता तथा प्रहरी नायव उपरीक्षक राजेन्द्रप्रसाद अधिकारीले जानकारी दिए ।

उनीहरुको गतिविधिमा शंका लागेर खानतलासी गर्दा इजाजत नलिएर लुकाई छिपाई राखेको अवस्थामा फेला परेको प्रवक्ता अधिकारीले बताए । जिल्ला अदालत स्याङ्जाबाट २५ दिनको म्याद थप लिइ अनुसन्धान थालिएको प्रहरीले जनाएको छ ।

त्यस्तै पुतलीबजार १३ आहाले बस्ने केहरसिंह नेपालीले बाघको हड्डी लुकाई छिपाई राखेको भन्ने सूचनाको आधारमा नेपालीको घर खानतलासी गर्दा हड्डी फेला परेको जनाएको छ । प्रहरीले बाघको जस्तो देखिने शरिरको टाउको, बङ्गरा सहित च्यापु सहित ८१ थान हड्डी बरामद गरि नेपालीलाई नियन्त्रणमा लिएर डिभिजन बन कार्यालयलाई बुझाएको जनाएको छ । त्यसै गरी प्रहरीले अबैध लागुऔषध (गाँजा) सहित ३ जनालाई पक्राउ गरेको छ । पक्राउ परेकाबाट ५ सय ४८ ग्राम गाँजा सहित पक्राउ गरेको जनाएको छ ।

गाँजा सहित पक्राउ पर्नेमा पुतलीबजार ८ का विनबहादुर सिंह र भारतको बेतिया जिल्ला वडा नम्वर १० चैलाभार पश्चिम बिहार घर भई पुतलीबजार नगरपालिका वडा नं. ३ बस्ने वर्ष २५ का संजिबकुमार सिंह र वर्ष १८ का रहमदिन आलम रहेका छन् । गाँजा सहित पक्राउ परेका भारतीय नागरिकसँग १ सय २ ग्राम गाँजा भेटिएपछि सोधपुछ गर्दा सिंहसँग गाँजा खरिद गरेको बताएपछि उनी पनि पक्राउ परेको जिल्ला प्रहरी कार्यालय स्याङ्जाका प्रवक्ता अधिकारीले जानकारी दिए ।

। पक्राउ परेको तीनै जनाको जिल्ला अदालतबाट १५ दिनको म्याद थप गरि अनुसन्धान थालिएको प्रहरीले जनाएको छ । बन्दाबन्दीको बेला अपराधिक क्रियाकलाप बढ्न सक्ने अनुमान गर्दै प्रहरीले सक्रियता बढाए सगै धमाधम अपराधिक क्रियाकलापमा संलग्न पक्राउ पर्न थालेका छन् ।

जिल्ला प्रहरी कार्यालय मातहतका सबै ईकाईहरुलाई कोरोना जोखिमबाट उच्च सर्तकर्ता अपनाउदै शान्तिसुरक्षाका लागि खटेर लाग्न प्रहरीहरुलाई निर्देशन दिएको जिल्ला प्रहरी प्रमुख प्रहरी उपरीक्षक होविन्द्र वोगटीले बताए ।