संगीताको बलात्कार गरेर आत्महत्या गर्न बाध्य पार्ने २ जना पक्राउ

२ असोज, काठमाडौं । सप्तरीमा किशोरीलाई बलात्कार गरेर आत्महत्या गर्न बाध्य पार्ने २ जना पक्राउ परेका छन् । डाकनेश्वरी नगरपालिका–७ की किशोरी संगीता मण्डलको बलात्कार गरेको आरोपमा स्थानीय १८ वर्षीय बल्लु भनिने सुमन कुमार मण्डल र रन्जित मण्डल पक्राउ परेका छन् । उनीहरुलाई बलान बिहुल गाउँपालिका वडा नं. ४ बाट पक्राउ गरिएको हो ।

पक्राउ परेकाहरु बलात्कारमा मुख्य आरोपी हुन् । आरोपीमध्ये अन्य दुई जना फरार छन् । उनीहरुको खोजी कार्य जारी छ । गत २९ भदौमा धानखेतमा पानीको अवस्था हेर्न गएकी संगीतामाथि गाउँकै चार जना युवाले सामूहिक बलात्कार गरेका थिए । गाउँका अगुवाहरुले केही नगद दिएर घटना मिलापत्र गर्न दबाव दिएपछि संगीताले आत्महत्या गरेकी थिइन् ।