७ महिनापछि खुल्यो आन्तरिक उडान

५ असोज, काठमाडौं । कोरोना महामारीले निम्त्याएको लकडाउनका कारण बन्द रहेका आन्तरिक उडान आजदेखि खुलेका छन् । गएको चैत ११ गतेदेखि शुरु भएको लकडाउनले बन्द रहेका उडान ७ महिनापछि खुलेका हुन् ।

नेपाल नागरिक उड्डयन प्राधिकरणले स्वास्थ्य सुरक्षाका मापदण्ड निर्धारण गरी उडान गर्नका लागि एयरलाइन्सहरूलाई आजदेखि अनुमति दिएको छ।

सोहीअनुसार एयरलाइन्सले आजदेखि उडान सुरू गरेका छन्। आजदेखि खुल्ने उडान सामान्य अवस्थाको तुलनामा २५ प्रतिशतमात्र हुने छन्। विमानस्थलको भीड व्यवस्थापन तथा मागका आधारमा उडानको कोटा निर्धारण गरिएको प्राधिकरणले जानकारी दिएको छ।

विमानस्थलमा आवश्यक सबै स्वास्थ्य सुरक्षा मापदण्ड तय गरिएको विमानस्थल कार्यालयले जनाएको छ ।