चेन्नेईलाई हराएको राजस्थान आईपीएलको शीर्ष स्थानमा

७ असोज, एजेन्सी । चेन्नेई सुपर किंग्सलाई १६ रनले हराउँदै राजस्थान रोयल्स आईपीएल क्रिकेटको शीर्ष स्थानमा उक्लिएको छ । दुबईमा राजस्थानले दिएको २ सय १७ रनको विशाल लक्ष्य पछ्याएको चेन्नेईले निर्धारित २० ओभरमा ६ विकेट गुमाएर २०० रन मात्रै बनाउन सक्यो ।

चेन्नेईका लागि फाफ डुप्लेसिसले ७२ रन बनाएपनि त्यो जितका लागि पर्याप्त भएन । त्यसअघि टस हारेर पहिले व्याटिङ गरेको राजस्थानले निर्धारित २० ओभरमा ७ विकेट गुमाएर २ सय १६ रन बनाएको थियो ।

उसका लागि सञ्जु सामसनले विष्फोट व्याटिङ गर्दै ७४ रन बनाए । ३२ बलमा ९ छक्का हानेका उनले विकेटकिपिङमा पनि राम्रो प्रदर्शन गरे । सर्वाधिक रन जोडेका उनी म्यान अफ द म्याच समेत बने । यस्तै कप्तान स्टिभ स्मिथले ६९ र जोफ्रा आर्चरले २७ रन जोडे । जितसँगै राजस्थान आईपीएल क्रिकेटमा शीर्ष स्थानमा उक्लिएको छ ।

१ खेलबाट २ अंक जोडेको राजस्थान सर्वाधिक ० दशमलव ८ रनरेटका आधारमा शीर्ष स्थानमा उक्लिएको हो । रोयल च्यालेञ्ज बेंग्लोर दोस्रो स्थानमा छ भने समान खेल र अंकसहित दिल्ली तेसो स्थानमा छ ।