आईपीएलमा २०० छक्का हान्ने चौथो खेलाडी बने रोहित

७ असोज, एजेन्सी । मुम्बई इण्डियन्सका कप्तान रोहित शर्मा आईपीएलमा सर्वाधिक छक्का हान्ने चौथो खेलाडी बनेका छन् । बुधबार कोलकत्ताविरुद्ध ६ छक्का प्रहार गरेका उनले २०० छक्काको कोशेढुंगा पार गरेका हुन् ।

आईपीएलमा सर्वाधिक छक्का हान्ने किर्तिमान क्रिस गेलको नाममा छ । उनले अहिलेसम्म १ सय २५ खेलबाट ३ सय २६ छक्का हानेका छन् । दोस्रो स्थानमा रहेका एबी डिभिलियर्सले २ सय १४ र तेस्रो स्थानमा रहेका धोनीले २ सय १२ छक्का हानेका छन् ।

१ सय ९० खेल खेलेर रोहितले आईपीएलमा २०० छक्का प्रहार गरेका हुन् । यसक्रममा उनले एक शतक बनाएका छन् । ३७ वटा अर्धशतक बनाएका छन् । अहिलेसम्म ४ हजार ९ सय ९० रन जोडेका रोहित ५ हजार रन जोड्न मात्रै १० रनले पछि छन् ।

अर्को खेलमा सम्भवतः १० रन जोडेमा उनी आईपीएलमा ५००० हजार रन पूरा गर्ने तेस्रो खेलाडी बन्नेछन् । अहिलेसम्म विराट कोहलीले ५ हजार ४ सय बढी रन बनाएर शीर्ष स्थानमा छन भने सुरेश रैनाले ५ हजार ३ सय बढी रन बनाएका छन् ।

रोहित आईपीएल क्रिकेटमा सर्वाधिक सफल खेलाडी र कप्तान हुन् । उनले आफ्नै कप्तानीमा अहिलेसम्म ४ पटक मुम्बई इण्डियन्सलाई उपाधि दिलाएका छन् । दोस्रो स्थानमा धोनी छन् । जसले चेन्नेईलाई ३ पटक उपाधि जिताएका छन् ।