दिल्लीबाटै आईएपीएलको उपाधि जित्ने सन्दीपको लक्ष्य

८ असोज, एजेन्सी । नेपाली युवा लेग स्पिनर सन्दीप लामिछानेले दिल्ली क्यापिटल्सबाट आईपीएलको उपाधि जित्ने लक्ष्य रहेको बताएका छन् । लगातार तेस्रो सिजन दिल्ली क्यापिटल्सबाट आइपिएल खेलिरहेका सन्दीपले आफ्नो लक्ष्य उपाधि जित्ने रहेको बताएका हुन् ।

पहिलो खेलमा टिममा नपरेपनि आफू अबका खेलमा टिममा पर्ने उनको भनाई छ । पहिलो खेलमा किंग्स ११ पञ्जावलाई सुपर ‌ओभरमा हराएको दिल्लीले दोस्रो खेल शुक्रबार चेन्नई सुपरकिंग्ससँग खेल्दैछ।

क्यारेबियन प्रिमियर लिग सिपिएल खेलेर उतैबाट युएई पुगेका सन्दीप क्वारेन्टिनमा रहेकाले पहिलो खेलका लागि उपलब्ध हुन नसकेको बताएका छन् । सिपिएलमा उनले जमैका तलावाजबाट समूह चरण र सेमिफाइनल गरी सबै ११ खेल खेल्दा १२ विकेट लिन सफल भएका थिए।

यसपटक दिल्लीका मुख्य स्पिनर रविचन्दन आश्विन घाइते भएकाले सन्दीपले मौका पाउने सम्भावना बढी नै छ । आश्विन पहिलो खेलमा बाया हातको पुराने चोटका कारण एक ओभर मात्रै बलिङ गरेर मैदाबाट बाहिरिएका थिए । उनले एकै ओभरमा दुई विकेट लिएर टिमलाई जिततर्फ उन्मुख गराएका थिए ।