राष्ट्र बैंकका ७ जनालाई कोरोना पुष्टि, गभर्नर क्वारेन्टाइनमा

९ असोज, काठमाडौं । नेपाल राष्ट्र बैंकका डेपुटी गभर्नरसहित ७ जनालाई कोरोना संक्रमण पुष्टि भएको छ । बैंक सुपरीवेक्षण विभाग र संस्थागत योजना विभागका २४ जना कर्मचारीको स्वाब परीक्षण गर्दा ७ जनामा कोरोना संक्रमण पुष्टि भएको हो ।

तीमध्ये एक जना डेपुटी गभर्नर शिवराज श्रेष्ठ, दुई जना संस्थागत योजना विभागका, तीन जना बैंक सुपरीवेक्षण विभागका र एक जना सामान्य सेवा विभागका कर्मचारी हुन् । केन्द्रीय कार्यालयमा एकैपटक सातजनामा कोरोना पुष्टि भएपछि आजदेखि केन्द्रीय बैंकको काम नै प्रभावित हुनसक्ने अनुमान गरिएको छ ।

यसैबीच राष्ट्र बैंकका गभर्नर महाप्रसाद अधिकारी फेरि होम क्वारेन्टाइनमा बसेका छन् । एकैपटक ७ जनामा संक्रमण देखिएपछि गभर्नर अधिकारी क्वारेन्टाइनमा बसेका हुन् । यसअघि झण्डै दुई हप्ता क्वारेन्टाइन बसेका अधिकारी फेरि एक हप्ताका लागि क्वारेन्टाइन बस्नुपर्ने बाध्यतामा पुगेका हुन् । जसले गर्दा राष्ट्र बैंकको सेवा प्रभावित भएको छ ।