पीसीआर परीक्षणका लागि बाध्य नपार्न सरकारको आग्रह

१२ असोज, काठमाडौं । सरकारले पीसीआर परीक्षणका लागि जोसूकैलाई बाध्य नपार्न आग्रह गरेको छ । सरकारका प्रवक्ता तथा परराष्ट्रमन्त्री प्रदीप ज्ञवालीले नेपालमा कोरोना संक्रमण बढि रहेको र जोखिम कहिलेसम्म रहन्छ भन्ने पूर्वानुमान गर्न नसकिने भएकाले अहिले नै कसैलाई पनि पीसीआर परीक्षणका लागि बाध्य नपार्न आग्रह गरेका हुन् ।

खासगरी काठमाडौं उपत्यका र बाहिर पनि पीसीआर परीक्षण बाध्य पार्दा नागरिकमा मानसिक समस्या सिर्जना भएको र भ्रामक कुराहरुले बढी महत्व पाएको मन्त्री ज्ञवालीको भनाई छ । सरकारले कोरोनाको जोखिम कम भएर नभई जीवन र जीविकाबीच सन्तुलनको आवश्यकताका कारणले धेरै क्षेत्र खुला गरेको भन्दै मन्त्री ज्ञवालीले सबै आफ्नो ठाउँबाट सतर्कता अपनाउनुपर्ने बताए ।

सर्वसाधारणले सरकारी आदेश निर्देशन र विज्ञको सुझाव मानेकै कारण नेपालमा कोरोनाको भयावह अवस्था आउन नपाएको पनि मन्त्री ज्ञवालीको दाबी छ ।
सरकारले काठमाडौंमा घरधनी र केही औद्योगिक प्रतिष्ठानले पीसीआर रिपोर्टका लागि सर्वसाधारणलाई बाध्य बनाएको भन्दै त्यस्तो नगर्न आग्रह गरेको छ ।