मोरङमा थप तीन जना संक्रमितको मृत्यु

१५ असोज, विराटनगर । मोरङमा कोरोना भाइरसको संक्रमणका कारण तीन जनाको मृत्यु भएको छ । होम आइसोलेसनमा बसेकी एक वृद्धा, एक पुरुष र अर्का एक जना कैदीको कोरोनाका कारण मृत्यु भएको हो ।

मृत्य हुनेमा मोरङ उर्लाबारी नगरपालिका– २ कि ८४ वर्षीया वृद्धा हुन् । विराट मेडिकल कलेजमा उपचारका क्रममा मंगलबार कोरोना पोजेटिभ देखिएपछि वृद्धा होम आइसोलेसनमै बसेकी थिइन् । उनको बिहीबार विहान मृत्यु भएको हो । यस्तै बुधबार राति सुनसरी इटहरीका दुई जनाको पनि संक्रमणका कारण विराटनगरमा मृत्यु भएको छ ।

इटहरीमा होटल व्यवसाय गर्ने इटहरी उपमहानगरपालिका–६ का ५६ वर्षीय पुरुष र लागूऔषध मुद्दामा पूर्पक्षका लागि मोरङ कारागारमा रहेका २७ वर्षीय युवकको मृत्यु भएको हो । ५६ वर्षीय पुरुषको बीपी कोइराला स्वास्थ्य विज्ञान प्रतिष्ठानमा भर्ना गरिएको १५ मिनेटमै बुधबार राति मृत्यु भएको हो ।

उनका अनुसार अत्यधिक ज्वरो, खोकी र श्वासप्रश्वासमा समस्या भएपछि विराट मेडिकल कलेजले रेफर गरेका मृतकलाई राति अस्पतालमा भर्ना गरिएको थियो ।

बुधबार राति नै लागूऔषध मुद्दामा पूर्पक्षका लागि थुनामा रहेका मोरङ कारागारमा रहेका २७ वर्षीय युवकको मृत्यु भएको थियो । एक्कासी श्वासप्रश्वासमा समस्या देखिएपछि युवकलाई कोशी अस्पताल ल्याइएको थियो । अस्पतालमा राति करिब साढे ८ बजे मृत्यु भएको हो ।