सुनसरी र सिराहाका दुई संक्रमितको मृत्यु

१६ असोज, विराटनगर । सुनसरी र सिराहाका दुई संक्रमितको मृत्यु भएको छ । विराट मेडिकल कलेजमा उपचारका लागि लैजाँदै गरेका उनीहरुको बाटोमै मृत्यु भएको हो ।

दुवै जनाको अस्पताल आउँदा आउँदै बाटोमा मृत्यु भएको हो । मृतक मध्ये एकजना सुनसरीको इटहरी उपमहानगरपालिका–१३ खनारका ९२ वर्षीय वृद्ध र अर्का सिराहा सुकीपुर नगरपालिका–२ का ५५ वर्षीय पुरुष हुन् ।

इटहरीका वृद्धमा तीन दिनअघि कोरोना पोजेटिभ देखिएको थियो । कोरोना पोजेटिभ देखिएपछि होम आइसोलेसनमा बसेका उनलाई श्वासप्रश्वासमा समस्या भएपछि आफन्तले अस्पताल ल्याएका थिए । अस्पतालमा आइपुग्दा वृद्धको शरीर चिसो भइसकेको अवस्थामा पाइएको देवले बताए । मृतक वृद्धमा दम, उच्च रक्तचाप र मधुमेहको पुरानै समस्या रहेको उनको भनाइ छ ।

सिराहा सुकीपुर नगरपालिका–२ का ५५ वर्षीय संक्रमित पुरुषलाई विराटनगरको नोवेल मेडिकल कलेजबाट थप उपचारका लागि विराट मेडिकल कलेज लगिएको थियो । शुक्रबार नै विराटनगरमा अर्का एक संक्रमित महिलाको पनि मृत्यु भएको छ ।