सर्वाधिक आईपीएल खेल्नेमा धोनी पहिलो, कोहली पाँचौ !

१६ असोज, एजेन्सी । चेन्नेई सुपर किंग्सका कप्तान महेन्द्र सिंह धोनी सर्वाधिक आईपीएल खेल खेल्ने पहिलो खेलाडी बनेका छन् । शुक्रबार हैदरावादविरुद्ध कप्तानी गरेका धोनीले सर्वाधिक १९४ क्याप जितेका हुन् । यसअघि यो किर्तिमान चेन्नेईकै अर्का व्याट्सम्यान सुरेश रैनाको नाममा थियो । रैनाले १९३ क्याप जितेका छन् ।

आईपीएलमा ५ हजार रन पूरा गर्ने पहिलो खेलाडी बनेका रैना सबैभन्दा धेरै आईपीएल खेल खेल्ने भारतीय खेलाडीको किर्तिमान पनि बनाएका थिए । तर यस सिजन व्यक्तिगत कारणले आईपीएल खेल्न नसकेका रैनाले आफ्नो किर्तिमान तोडेकोमा धोनीलाई बधाई दिएका छन् ।

यस्तै सर्वाधिक धेरै आईपीएल खेल खेल्ने तेस्रो खेलाडी मुम्बईका कप्तान रोहित शर्मा हुन् । उनले १९२ क्याप जितेका छन् । उनले हिजो मात्रै आईपीएलमा ५ हजार रन पूरा गरेका थिए । आईपीएलमा ५ हजार रन पूरा गर्ने उनी तेस्रो खेलाडी हुन् ।

यस्तै सर्वाधिक आईपीएल खेल्ने चौथो खेलाडी कोलकत्ताका कप्तान दिनेश कार्तिक हुन् । उनले १८५ क्याप जितेका छन् । आईपीएलमा सर्वाधिक क्याप जित्ने खेलाडीको पाँचौ नम्बरमा बेंग्लोरका कप्तान विराट कोहली र राजस्थानका व्याट्सम्यान रविन उथप्पा छन् । उनीहरुले समान १८० क्याप जितेका छन् ।

बेंग्लोरका कप्तान कोहली आईपीएलमा सर्वाधिक छिटो ५ हजार रन पूरा गर्ने भारतीय खेलाडी हुन् । उनले १५७ इनिङमा ५ हजार रन पूरा गरेका छन् । रैनाले १७१ इनिङमा ५ हजार रन पूरा गर्दा रोहितले भने १८७ इनिङमा ५ हजार रन पुरा गरेका हुन् ।

रैना र कोहलीले गएकै सिजनमा ५ हजार रन पूरा गरेपनि रोहितले भने यो सिजनमा ५ हजार रन पुरा गर्ने खेलाडी बनेका हुन् । आईपीएलमा एकै सिजनमा सर्वाधिक धेरै रन बनाउने किर्तिमान पनि कोहलीको नाममा छ ।

कोहलीले सन् २०१६ को सिजनमा ९ सयभन्दा धेरै रन बनाएका थिए । यो रेकर्ड अहिलेसम्म कसैले तोड्न सकेको छैन् । यस्तै आईपीएलमा सर्वाधिक धेरै ५ शतक बनाउने कोहली एक्लो भारतीय व्याट्सम्यान पनि हुन् ।