आईपीएलमा दिल्ली र बेंग्लोर शीर्ष स्थानमा

१८ असोज, एजेन्सी । आईपीएल क्रिकेटमा दिल्ली क्यापिटल्सले कोलकत्तालाई हराएको छ । युएईमा जारी १३ औं संस्करणको आईपीएल क्रिकेटमा गएराती दिल्लीले तेस्रो जित निकाल्दै अंक तालिकाको शीर्ष स्थानमा उक्लिएको हो ।

सारजाह क्रिकेट मैदानमा दिल्लीले दिएको २ सय २९ रनको लक्ष्य पछ्याएको कोलकत्ताले २० ओभरमा ८ विकेट गुमाएर २ सय १० रन मात्र बनाउन सक्यो ।

कोलकत्ताका लागि नितिश रानाले ५८ रन बनाए । यस्तै इयान मोर्गनले ४४ रन जोड्दा राहुल त्रिपाठीले ३६ रन बनाए । ओपनर व्याट्सम्यान शुभमान गिलले २८ रन जोड्दा आन्द्रे रसेलले १३ रन बनाए ।

दिल्लीका एनरिक नोर्ट्जेले ३ विकेट लिए । यस्तै हर्सल पटेलले २ तथा अमित मिश्रा, मार्कुस स्टोनिस र कागिसो राबडाले एक एक विकेट लिए । दिल्लीले सन्दीपलाई भने अझै खेलाएको छैन् । सन्दीप बिनाको टिमले उत्कृष्ट प्रदर्शन गरेपछि दिल्ली उनी प्लेइङ सेटमा पर्न छाडेका हुन् ।

यस अघि टस हारेर पहिले ब्याटिङ गरेको दिल्लीले २० ओभरमा ४ विकेट गुमाएर २ सय २८ रनको विशाल योगफल बनाएको थियो । दिल्लीका लागि कप्तान श्रेयास आयरले सर्वाधिक ८८ रन बनाए भने ओपनर व्याट्सम्यान पृथ्वी शाले ६६ रनको योगदान दिए ।

कोलकत्ताका आन्द्रे रसेलले दुई विकेट लिए । यस्तै भरुण चक्रवर्ती र कमलेस नगरकोटीले एक एक विकेट लिए । जितसँगै दिल्लीले ४ खेलबाट ६ अंक जोडेको छ । दिल्ली तालिकाको शीर्ष स्थानमा समेत उक्लिएको छ ।

४ खेल खेल्दा दिल्ली र र्बेंग्लोरले मात्रै ६ अंक जोडेर पहिलो र दोस्रो स्थानमा छन् । हिजै भएको खेलमा बेंग्लोरले राजस्थान रोयल्सलाई ८ विकेटले हराएको थियो ।