डा.केसीलाई भेट्न रोक, डाक्टरको प्रदर्शन

१८ असोज, काठमाडौं । चिकित्सा शिक्षा सुधारको माग गर्दै अनसन बसिरहेका डा.गोविन्द केसीलाई भेट्न रोक लगााइएको छ । कोरोना संक्रमणको उच्च जोखिम भएपछि डा.केसीसँगको भेटघाटमा रोक लगाइएको हो ।

अनसनको आज २१ औँ दिन स्वास्थ्य अवस्था जटिल हुनुका साथै कोरोना संक्रमणको जोखिम समेत बढेपछि भेटघाटमा रोक लगाइएको उनका सहयोगी प्रितम सुवेदीले जानकारी दिएका छन् । यसअघि हिजो डा.बाबुराम भट्टराई र अस्ति पूर्वराष्ट्रपति डा.रामवरण यादवले डा.केसीसँग भेटवार्ता गरेका थिए ।

अनसन लम्बिदै जाँदा उनको स्वास्थ्य अवस्था समेत जटिल बनेको छ । तर अहिलेसम्म सरकारले माग सुनुवाईका लागि कुनै पहल गरेको छैन् । लामो समयसम्म पनि सरकारले बेवास्ता गरेपछि शिक्षण अस्पतालमा डाक्टरहरुले विरोध प्रदर्शन गर्ने भएका छन् ।

आइतबार दिउँसो १ बजेदेखि उनीहरुले पेनडाउन गरेर अस्पताल अगाडी विरोध प्रदर्शन गर्ने भएका छन् । कर्णाली लगायतका विकट क्षेत्रमा एमबीबीएस पठनपाठन हुनुपर्ने माग गर्दै डा.केसी गएको भदौ २९ गतेदेखि अनसन बसिरहेका छन् । जुम्लाबाट अनसन शुरु गरेका उनी अहिले काठमाडौंको शिक्षण अस्पतालबाट अनसनलाई निरन्तरता दिएका हुन् ।