चेन्नेईको उत्कृष्ट कमब्याक, पञ्जाबमाथि १० विकेटको शानदार जित

१९ असोज, एजेन्सी । चेन्नई सुपर किङ्सले आईपीएल क्रिकेटमा उत्कृष्ट कमब्याक गरेको छ । दुबईमा आइतबार भएको खेलमा किङ्स इलाभेन पन्जाबलाई १० विकेटले पराजित गर्दै चेन्नईले कमब्याकका रुपमा दोस्रो जित निकालेको हो । यसअघि धोनीको टिम लगातार तीन खेलमा पराजित भएको थियो ।

दुबई क्रिकेट मैदानमा पन्जाबले दिएको १ सय ७९ रनको लक्ष्य चेन्नईले १७ ओभर ४ बलमा बिना विकेट पुरा गर्यो । चेन्नईको जितमा फाप डु प्लेसिस र शेन वाट्सनले सानदार ब्याटिङ गरे । दुवै जनाले कुनै विकेट नगुमाई चेन्नेईलाई जित दिलाएका हुन् ।

डुप्लेसिस ५३ बलमा ११ चौका र १ छक्कासहित ८७ रनमा अविजित रहे । वाट्सनले ५३ बलमा ११ चौका र ३ छक्कासहित अविजित ८३ रन जोडे ।

यस अघि टस जितेर पहिले ब्याटिङ गरेको पन्जाबले २० ओभरमा ४ विकेट गुमाएर १ सय ७८ रन बनाएको थियो । पन्जाबको लागि कप्तान लोकेश राहुलले ६३ रनको अर्धशतकीय इनिङ्स खेले । निकोलस पुरन ३३ रन जोड्दा आउट भए ।

यस्तै मन्दिप सिंहले २७ तथा मायांक अग्रवालले २६ रन बनाए । चेन्नईका सार्दुल ठाकुरले २ विकेट लिए । रविन्द्र जडेजा र पियुस चावालाले एक एक विकेट लिए । जितसँगै चेन्नईले ५ खेलमा ४ अंक जोडेको छ । चेन्नई तालिकाको छैटौं स्थानमा समेत उक्लिएको छ ।

पन्जाबले ५ खेलमा २ अंक जोडेको छ । पन्जाब पुछारमा छ ।