बेंग्लोरलाई हराउदै दिल्ली शीर्ष स्थानमा

असोज १९, एजेन्सी । आईपीएल क्रिकेटमा नेपाली युवा लेगस्पिनर सन्दीप लामिछाने आबद्ध दिल्ली क्यापिटल्सले चौथो जित हात पारेको छ । सोमबार बेंग्लोरविरुद्ध ५९ रनको जित निकाल्दै दिल्ली फेरि आईपीएलको शीर्ष स्थानमा उक्लेको हो ।

दुबईमा टस हारेर पहिले व्याटिङ गरेको दिल्ली निर्धारित २० ओभरमा ४ विकेट गुमाएर १ सय ९६ रन बनाएको थियो । उसका लागि मार्कुस स्टोईनिसले ५३, पृथ्वी शाहले ४२, रिसभ पन्तले ३७ र शिखर धवनले ३२ रन बनाए । बेंग्लोरका मोहम्मद सिरजले २ विकेट लिए ।

१९७ रनको विशाल लक्ष्य लिएर जवाफी व्याटिङ थालेको बेंग्लोरले भने निर्धारित २० ओभरमा ९ विकेट गुमाएर १३७ रन मात्रै बनाउन सक्यो । उसका लागि कप्तान विराट कोहलीले ४३ रन बनाउनुबाहेक अरुले गतिलो प्रदर्शन गर्न सकेनन् । दिल्लीका कागिसो रबाडाले ४ विकेट लिए ।

जितसँगै ५ खेलबाट दिल्लीले ८ अंक जोडेर शीर्ष स्थानमा पुगेको छ । बेंग्लोर भने ६ अंकसहित तेस्रो स्थानमा छ । आजको खेलमा ४३ रन जोडेका कोहलीले ट्वेन्टी ट्वेन्टी क्रिकेटमा ९ हजार रन पूरा गरेका छन् ।