आमाबुवाबीच नागरिकता विवाद, बुवाबाटै बेसरी कुटिएका डेढ वर्षीय एक बालक अस्पताल भर्ना

धीरुभाइ

२० असोज, सप्तरी । श्रीमान, ससुराबाट पटक–पटक कुटपिटकाे पीडा भोग्दै आएकी एक महिला र दुधे बालकलाई मरनासन्न हुने गरी कुटपिट गरिएको छ । सप्तरीको तिलाठी कोइलाडी गाउँपालिका वार्ड नम्बर २ लौनिया निवासी रिंकीदवी खंगलाई ससुरा जगदिश खंग र पति रामेश्वर खंगले पटक–पटक कुटपिट गर्दै आएको पीडितले बताए ।

नागरिकता बनाउने, खानपानको विषयमा कुरा उठाउँदा उनीहरुबाट कुटिदै आएको भन्दै रिंकीले दुई पटक प्रहरीमा उजुरी दिएकोमा पञ्चायतमै सिमित रहेको छ ।

गत आइतबार डेढ वर्षिय काखे बालक मिथिलेशलाई बोकेर नागरिकता बनाउनका लागि आवश्यक कुरा बुझ्न घर बाहिर गएको कुरा थाहा पाएपछि ससुराको निर्देशनमा पतिले काखे बालक मिथिलेशलाई मरनासन्न हुने गरी कुटेको उनले भने, पाँच-छ पटक उचालेर भूइँमा बजारे थियो । जसले गर्दा छोरा अचेत भयो । अचेत अवस्थामै राजविराजस्थित छिन्नमस्ता अस्पतालमा भर्ना गरियो ।

करिब तीन-चार घण्टा अचेत रहयो । बालकको सिटी स्क्यान, इजिसीजी लगायतको जाँच गरेको बताइएको छ । अहिलेपनि सोही अस्पतालमा उपचार भइरहेको छ । पति निकै सोझो भएको मौकाको फाइदा उठाउन ससुराले भनेको कुरा नमानेपछि पतिलाई (कुरा लगाएर) उस्काएर शारीरिक, मानसिक, आर्थिक यातना दिनुको साथै यहाँ कुनै सम्बन्ध छैन्, माइतमा गएर बस ।

नत्र तेरो छोरालाई नै मारिदिन्छु भन्ने गरेको रिंकीले बताइन । यसैकारण मेरो छोरालाई मार्नकै लागि पशुतुल्य कुटेको उनको कथन छ ।

घटनापछि बालकका पिता रामेश्वर खंगलाई राती नै प्रहरीले नियन्त्रणमा लिएको जानकारी दिदै जिल्ला प्रहरी कार्यालय सप्तरीका प्रहरी नायब उपरीक्षक भूवनेश्वरप्रसाद साहले घटना सम्बन्धमा थप अनुसन्धान भइरहेको बताए ।

यसअघि रिंकीलाई कुटपिट गर्दा प्रहरीमा दिएको उजुरीपछि २०७५ माघ ९ गते र २०७६ माघ १३ गतेमा प्रहरीमा मिलापत्र हुँदा पतिले विवाह दर्ता गराइदिने, नागरिकता बनाइ दिने, मानाचामल दिने, कुटपिट नगर्ने सहमति गरेको थियो ।