काठमाडौं-तराई द्रुतमार्ग निर्माण कछुवा गतिमा !

२१ असोज, काठमाडौं । काठमाडौं–तराई द्रुतमार्ग निर्माणको काम कछुवा गतिमा भइरहेको पाइएको छ । चार वर्षभित्र निर्माण सक्ने गरी आर्थिक वर्ष २०७३/०७४ जेठदेखि निर्माण थालिएको काठमाडौं–तराई द्रुतमार्ग अर्थात फास्ट ट्रयाकमा अहिलेसम्म ११ प्रतिशत मात्रै काम भएपछि कछुवा गतिमा निर्माण भइरहेको पाइएको हो ।

यो सुरुङमार्ग नेपाली सेनाले निर्माण गरिरहेको छ । अब आयोजना आर्थिक वर्ष २०८०/०८१ आर्थात् निर्धारितभन्दा ३ वर्ष ढिलो गरी बनाईसक्ने तयारी छ । आयोजनामा अहिलेसम्म कुल खर्च गर्नुपर्ने मध्ये ९ दशमलव ५२ प्रतिशत मात्रै बजेट खर्च भएको संसदको विकास तथा प्रविधि समितिमा सेनाले बुझाएको प्रतिवेदनमा जनाइएको छ ।

प्रतिवेदन अनुसार जग्गा अधिग्रहण, रुख काटन, सर्भे तथा डिजाइन, सडक निर्माण, अन्तर्राष्ट्रिय सुरुङमार्ग निर्माण, पुल निर्माण र एक्सप्रेस–वे निर्माण लगायतका कुनै पनि काममा शत प्रतिशत प्रगति भएको छैन् ।

आयोजनाले ढुंगा माटोको कटिङमा ७२ दशमलव ३४ प्रतिशत काम सकाएको छ । ढुंगामाटो फिलिङको काम ४६ दशमलव ३९ प्रतिशत, मेसिनरी स्ट्रक्चरको काम ४६ दशमलव ३१, रिटेनिङ वालको काम १० दशमलव २९, पाइप तथा कल्भर्ट निर्माणको काम ३२ दशमलव २ प्रतिशत सकिएको आयोजनाले जनाएको छ ।

बक्स कल्भर्टको काम ४ दशमलव ७६ प्रतिशत, ग्याबिन भर्ने काम ६ दशमलव ३२ प्रतिशत, रुख काटानको काम ९३ दशमलव ८२ प्रतिशत र जग्गा प्राप्तिको काम ९६ दशमलव ७७ प्रतिशत मात्रै भएको छ । ७२ किलोमिटरको द्रुतमार्गमा १० दशमलव ५९ प्रतिशत खण्डमा सुरुङमार्ग र ६ दशमलव ४१ प्रतिशत खण्डमा पुल बनाउनुपर्नेछ ।

सुरुङ बनाउने निर्माण कम्पनी छनोट गर्न प्रारम्भिक योग्यता निर्धारणका लागि प्रक्रिया अघि बढेको छ । २७ वटा कम्पनीले यो ठेक्का प्रक्रियामा भाग लिएका छन् । दुई वटा प्याकेजमा ३ वटा सुरुङको निर्माण अघि बढाउन लागिएको छ । द्रुतमार्गमा बन्ने पुल निर्माणका लागि निर्माण कम्पनी छनोट गर्न मूल्यांकन चलिरहेको छ ।