कोहलीको ९० रनमा बेंग्लोरले चेन्नेईलाई हरायो

२५ असोज, एजेन्सी । आईपीएल क्रिकेटमा रोयल च्यालेन्जर्स बैंगलोरले युएईमा चेन्नेई सुपर किंग्सलाई हराएको छ । दुबईमा शनिबार राति साविक उपविजेता चेन्नईलाई ३७ रनले हराउँदै बैंगलोरले चौंथो जित निकालेको हो ।

दुबई अन्तराष्ट्रिय क्रिकेट स्टेडियममा बैंगलोरले दिएको १ सय ७० रनको लक्ष्यसहित जवाफी ब्याटिङ गरेको चेन्नईले २० ओभरमा ८ विकेट गुमाएर १ सय ३२ रन मात्र बनाउन सक्यो ।

चेन्नईका लागि अम्बाती रायाडुले सर्वाधिक ४२ रन बनाए । यस्तै नारायण जागाडिसनले ३३ रन जोड्दा शेन वाट्सनले १४ र कप्तान महेन्द्र सिंह धोनीले १० रन बनाए ।

बैंगलोरका लागि क्रिस मोरिसले ३ विकेट लिए । वासिङ्गटन सुन्दरको नाममा २ विकेट रह्यो । यस अघि टस जितेर पहिले ब्याटिङ गरेको बैंगलोरले २० ओभरमा ४ विकेट गुमाएर १ सय ६९ रन बनाएको थियो ।

बैंगलोरका लागि कप्तान विराट कोहलीले अविजित रहदै ९० रनको अर्धशतकीय इनिङ्स खेले । शिवम दुवेले अविजित २२ रन जोडे । यस्तै देवदुत पडीक्कलले ३३ रन जोड्दा वासिङ्गटन सुन्दरले १० रन बनाए । चेन्नईका सार्दुल ठाकुरले २ तथा साम करण र दिपक चाहरले एक एक विकेट लिए ।

जितसँगै बैंगलोर तालिकाको चौंथो स्थानमा उक्लिएको छ ।