बीएम फाउन्डेसनको लापरबाहीले स्याङ्जामा कोरोना फैलियो

२८ असोज, चापाकोट । स्याङ्जामा कोरोना संक्रमितको संख्या दिन दुगुणा रात चौगुणा बढ्न सक्ने आंकलन गरिएको छ । हिजो मात्रै स्वास्थ्य निर्देशनालय गण्डकी प्रदेशले स्याङ्जाको चापाकोटमा १४ जनामा कोरोना संक्रमण भएको पुष्टि गरेको छ । व्यापक सावधानी र सजकता अपनाउँदा समेत परालको आगो फैलिए झैं कोरोना संक्रमितको संख्या वृद्धि हुनुमा चिकित्सकको लापरवाही भएको स्थानीयको आरोप छ ।

केही दिन अगाडी मात्रै बीएम फाउन्डेसनले चापाकोटमा नेत्र रोगको उपचार गर्ने भन्दै स्वास्थ्य शिविर संचालन गरेको थियो। बीएम फाउन्डेसनका अध्यक्ष रहेका डा.बुद्धिमान श्रेष्ठ स्याङ्जा चापाकोट नगरका नेकपाका नेता हुन् । स्वास्थ्य शिविर संचालन गर्ने भन्दै श्रेष्ठले स्थानीय नेता कार्यकर्तादेखि सर्वसाधारणलाई निम्तो दिदै आफ्नै लगानीमा खोलिएको आँखा अस्पतालको उद्घाटन गरेका थिए ।

उद्घाटन गरेको दुई दिन नबित्दै आँखा उपचारमा संलग्न चिकित्सक र बीएम फाउन्डेसनका अध्यक्ष बुद्धिमान श्रेष्ठलाई कोरोना पोजेटिभ देखिएको छ । लगत्तै सयौंको संख्यामा उपस्थित स्वास्थ्य शिविरमा उपचार गर्न आएका स्थानीयमा कोरोनाको लक्षण देखियो । लक्षण देखिएपछि चापाकोट नगरपालिकाले स्वाब परिक्षण गरेको थियो ।

परिक्षण गर्ने क्रममा चापाकोटमा १४ जनामा कोरोना पोजेटिभ भेटिएकोमा अहिले नगरपालिकाले सबैलाई आइसोलेसनमा राखेको छ भने स्वाब संकलन गर्ने कार्यलाई तीब्र बनाएको चापाकोट नगरपालिकाका स्वास्थ्य शाखा प्रमुख बिन्दु कोइरालाले नेपालबहसलाई जानकारी दिए।

गण्डकी प्रदेश विकास परिषदका सदस्य समेत रहेका डा.बुद्धिमान श्रेष्ठले बेला र परिस्थिति चिन्न नसक्नु र आफै चिकित्सक भएर पनि सोझा साझा जनतालाई शिविर संचालन गर्ने भन्दै कोरोना फैलाउने काम गरेको आरोप स्थानीयले लगाएका छन् ।

आँखा अस्पताल संचालनमा ल्याउनु राम्रो भएको तर महामारीबाट बच्न जुन सावधानी अपनाउनु पर्ने थियो त्यो सावधानी न अपनाउँदा चापाकोटमा खतराको घण्टी बजेको चापाकोट नगरका नगरप्रमुख शिवकुमार गिरिले बताएका छन् । यद्यपि गल्ती जसले गरेपनि आगामी दिनमा गल्ती नदोहोर्‍याउन नगर प्रमुख गिरिले आग्रह गरेका छन् ।

संक्रमितको संख्या शुन्य बनाउन दिन रात कसरत गरिरहेता पनि साथीहरूले गल्ती गर्दिदाँ आफु कोरोना नियन्त्रणमा असफल भएको गिरिको जिकिर छ ।