आज नवरात्रकाे तेस्रो दिन, चन्द्रघण्टा देवीको पूजा आराधना गरिँदै

३ कात्तिक, काठमाडौं । बडादशैंको नवरात्रअन्तर्गत आज साेमबार तेस्रो दिन । चन्द्रघण्टा देवीको पूजा आराधना गरिँदैछ । यो बर्ष कोरोना माहामारीका कारण देवी भगवतीको दर्शन र आराधना गर्न भक्तजनहरुलाई  देशभरका शक्तिपीठहरुमा पुजा गर्न निषेध गरिएको छ ।

घटस्थापनाका दिन घरघरमा देवी दुर्गाको प्रतीमा स्थापना गरी जमरा राखिएको दशैं घरमा लगातार नौ दिनसम्म पूजा आराधना गर्ने परम्परा रहेको छ । देवी दुर्गाका तीन रुप महाकाली, महालक्ष्मी र महासरस्वतीको नवरात्रभर विधिपूर्वक आह्वान गरी पूजा गरिन्छ ।

पहिलो दिन शैलपुत्री, दोस्रो दिन ब्रह्मचारिणी, तेस्रो दिन चन्द्रघण्टा, चौथो दिन कुष्माण्डा, पाँचौँ दिन स्कन्दमाता, छैटौँ दिन कात्यायनी, सातौँ दिन कालरात्रि, आठौँ दिन महागौरी र नवौँ दिन सिद्धिदात्रीको पूजाआराधना गरिन्छ ।

नवरात्रभर दुर्गा सप्तशती चण्डी, श्रीमद्देवीभागवत र अन्य देवी स्तोत्र एवं पाठ गरिन्छ । घटस्थापनाका दिन राखिएको जमरा दुर्गालाई चढाएर विजयादशमीको दिन टीका प्रसाद सँगै लगाउने गरिन्छ ।