अस्पतालको लूट : कोरोनाको लक्षण देखिएकालाई ५० हजार र जटिल बिरामीलाई २ लाख धरौटी !

५ कार्तिक, काठमाडौं । सरकारी संरक्षणमै अस्पतालले कोरोना संक्रमित बिरामीबाट लूट शुरु गरेका छन् । धुलिखेल अस्पतालले कोरोना संक्रमित बिरामीको लागि नयाँ मापदण्ड भन्दै भारी शुल्क असुलीको सूची सार्वजनिक गरेको छ ।

जहाँ बिरामीले कोरोना लागेपछि उपचार गर्नुपर्ने शुल्क सूची राखेको छ । धुलिखेल अस्पतालका अनुसार सामान्य लक्षण भएका बिरामी अस्पताल बिरामी भएमा ५० हजार रुपैयाँ धरौटी बुझाउनुपर्नेछ । यस्तै मध्यम जटिल बिरामीले पहिले एक लाख रुपैयाँ अस्पतालको खातामा राखेपछि मात्रै उपचार शुरु हुने धुलिखेल अस्पतालले जारी गरेको प्रेस विज्ञप्तीमा उल्लेख छ ।

यस्तै जटिल प्रकृतिका बिरामीको उपचारका लागि पहिले २ लाख रुपैयाँ धरौटी बुझाउनुपर्नेछ । सरकारले सार्वजनिक गरेको स्वास्थ्य उपचार मापदण्डभन्दा १०० गुणा बढी असुल्ने काम धुलिखेल अस्पतालले गरेको छ ।

सरकारले सामान्य लक्षण भएका बिरामीबाट ३ हजार ५ सय, मध्यम लक्षण भएका बिरामीबाट ७ हजार ५ सय र जटिल बिरामीबाट १५ हजार रुपैयाँसम्म शुल्क लिएर उपचार शुरु गर्न भनेको छ । तर निजी अस्पतालले भने पहिल्यै धरौटी रकम बुझाएपछि मात्रै उपचार शुरु गर्ने बताएका छन् ।

जसको अहिले सामाजिक सञ्जालमा चर्को आलोचना भइरहेको छ । सरकारले यस्तो महामारीको बेला पनि आफ्नो उपचार आफै गर्नु भन्ने सरकारको निर्णय गरेपछि सबै सर्वसाधारण सरकारका विरुद्धमा उभिएका छन् । चर्को आलोचना र विरोध गरेपनि सरकारले अहिलेसम्म कोरोना संक्रमितको निःशुल्क उपचार गर्ने घोषणा गरेको छैन् ।