नेपाल–भारत सीमा जोड्ने झोलङ्गे पुल दुई दिन खुल्ने

११ मंसिर, दार्चुला । कोभिड–१९ का कारण गत चैत ११ गतदेखि बन्द रहेको दार्चुलास्थित नेपाल–भारत सीमा जोड्ने झोलङ्गे पुल हप्तामा दुई दिन खोल्न शुरु गरिएको छ । जिल्ला प्रशासन कार्यालय दार्चुलाले सीमा पुल बन्द हुँदा नेपाली मजदूर र विद्यार्थी मर्कामा परेको भन्दै सातामा दुई दिन पुल खुलाउन भारतीय पक्षलाई आग्रह गरेसँगै पुल खुलेको हो ।

पुल बुधबार र शनिबार बिहान १० बजेदेखि दिउँसो ३ बजेसम्म खुल्ने प्रमुख जिल्ला अधिकारी शरदकुमार पोखरेलले बताए । दैनिक छ घण्टा पुल खुलेपछि सर्वसाधारण, मजदूर र विद्यार्थीलाईसमेत सहज भएको छ ।

कोभिड–१९ का कारण पुल नखुल्दा यहाँका स्थानीयवासीलाई बिहेबारी, औषधि उपचार, विद्यार्थीको पठनपाठन, रोजगारीलगायत दैनिक जनजीवनमा कठिनाइ उत्पन्न भएको भन्दै सबै पक्षबाट हप्तामा दुई दिन पुल खोल्ने प्रस्ताव आएको यिथो । पुल खुल्ने भएपछि सर्वसाधारणलाई सहज भएको छ ।

म्याद नाघेका समान भित्रिदै

जिल्ला प्रशासन कार्यालय दार्चुलाले हप्तामा दुई दिन नेपाल भारत जोड्ने झोलङ्गे पुल खुला गर्ने निर्णयसँगै सिमावर्ती भारतीय बजार धार्चुलाबाट म्याद नाघेका समान भित्रिन थालेको छ । छोटी भन्सार कार्यालय दार्चुलाका अनुसार दैनिक उपभोग्य वस्तु तथा जङगफुड म्याद नाघेको भित्रिन थालेको हो ।

धार्चुलाका व्यापारीले आठ महिनादेखि बिक्री नभएर थन्किएको समान अहिले नेपाली बजारमा पठाउन थालेको छ । पुलघाटमा खटिएका सुरक्षाकर्मीका अनुसार पिठो, खाने तेल, बिस्कुटलगायत जङ्गफुड म्याद नाघेको भेटिने गरेको छ । म्याद नाघेका केही समान फिर्ता गर्न पठाइए पनि अधिकांश व्यापारी तथा सर्वसाधारणले त्यतिकै सामान लिएका छन् । अहिलेकै अवस्थामा म्याद नाघेका वस्तु आउने क्रम नरोकिए स्थानीय प्रशासनले बजार अनुगमन गरी नष्ट गर्नुको विकल्प नरहेको सुरक्षाकर्मी बताउँछन् ।