दिनेश मेमोरियल टी ट्वान्टी : सत्यम् पब्लिक कलेज ७९ रनले विजयी

१५ मंसिर, वीरगञ्ज । दिनेश मेमोरियल टी ट्वान्टी क्रिकेट टुर्नामेण्टमा सत्यम् पब्लिक कलेज विरगञ्ज ७९ रनले जितेको छ । बाराको पर्सौनी दुधौरा नदीको छेउ स्थित क्रिकेट मैदानमा सम्पन्न उद्घाटन खेलमा बहुअरी क्रिकेट क्लब बाराको विरुद्धमा पहिलो ब्याटिङ्ग गरेको सत्यम् पब्लिक कलेजले निर्धारित २० ओभरमा ६ विकेट खर्चेर १८७ रनको विशाल लक्ष्य प्रस्तुत गरेको थियो ।

जवाफी ब्याटीङ्गमा ओर्लेको बहुअरी क्रिकेट क्लब १७ ओभरमा सबै विकेट गुमाउँदै जम्मा १०७ रनमा सिमित भएपछि ७९ रनको फराकिलो अन्तरले सत्यम् पब्लिक कलेज विरगञ्जले जित हात पार्न सफल भएको हो ।

खेलमा विजयी टिम सत्यम् पब्लिक कलेजको तर्फबाट ४८ बलमा ७१ रन बनाएका मिथलेस कुमार म्यान अफ दि म्याच भएका छन् । भने विपक्षी टिम बहुअरी क्रिकेट क्लबका तर्फबाट सरोज साह तथा सत्यम् पब्लिक कलेजका अरबाज अँसारीले ३-३ विकेट लिएर उत्कृष्ट खेल प्रदर्शन गरेको आयोजक कमिटीका अध्यक्ष सचिन कुमारले बताएका छन् ।

आज देखि सुरु भएको यस टी–ट्वान्टी क्रिकेट टुर्नामेन्टको उद्घाटन स्वर्गीय दिनेश प्रसादका श्रीमती मञ्जु देवीले गरिन ।