आजदेखि सडकमा लत्रिएका तारलाई काट्दै सीताराम हाछेथु

२१ मंसिर, ललितपुर ।  आज आइतबारदेखि ललितपुर महानगरपालिकाका अव्यवस्थित तार हटाइने भएको छ । जताततै लत्रिएका तारका कारण शहरलाई कुरुप बनाएको भन्दै आजदेखि यस्ता तार हटाइने महानगरपालिका अन्तर्गतको नगर प्रहरी बल प्रमुख सीताराम हाछेथुले बताए ।

अब सडकमा लत्रिएका तारलाई काटिदिने र झोल्लिएका तारलाई मुठा बनाएर राखिदिने उनले बताए । अब ललितपुर महानगरपालिका यस्ता तार राख्न ट्यागलाई अनिवार्य गर्ने पनि नगर प्रहरी प्रमुख हाछेथुले बताए । यो नियम अटेर गर्नेलाई कारबाही गर्ने पनि उनको भनाइ छ ।

ललितपुर नगर प्रहरीले यसअघि शहरी सौन्दर्य बढाउन होर्डिङ बोर्ड हटाउने अभियान थालेको थियो । साढे दुई महिना लगाएर ललितपुर महानगर भित्रका होर्डिङबोर्ड हटाएको नगर प्रहरीले अव्यवस्थित तार हटाउने अभियान पनि व्यवस्थित नहुँदासम्म जारी राख्ने हाछेथुले बताए ।