सदर चिडियाखाना बिहीबारबाट खुल्ला हुने, मास्क अनिवार्य

२४ मंसिर, काठमाडौं । ललितपुरको जाउलाखेलमा रहेको सदर चिडियाखाना सर्वसाधारणका लागि बिहीबारबाट खुल्ला हुने भएको छ । सार्वजनिक धार्मिक एवंम् पर्यटकीय क्षेत्रहरु क्रमशः खुल्दै गएको अवस्थामा भोलीदेखि चिडियाखाना पनि औपचारिक रुपमा सञ्चालनमा आउने भएको हो ।

कोभिड–१९ को संक्रमण र सन्त्रास कायमै रहिरहेको अवस्थामा बजारको चहलपहल र माग र आवश्यकताका आधारमा आवश्यक स्वास्थ्य सुरक्षाको प्रोटोकल अपनाएर व्यवसाय शुरु गर्न लागिएको सदर चिडियाखाना जावलाखेलले जनाएको छ । तर,सर्वसाधारण भिजिटरहरुले पहिले जस्तै स्वतन्त्र भने नपाउने चिडियाखानाले जनाएको छ ।

एक पटकमा ७ सयदेखि ८ सय जनासम्म दर्शक चिडियाखाना भित्र प्रवेश गर्न पाउने छन् भने भित्र प्रवेश गरेको दुईदेखि साढे दुई घण्टामा बाहिर निस्कनुपर्ने छ । चिडियाखाना जाने जो कोहिले अनिवार्य मास्क लगाउनुपर्ने वाध्यकारी नियम बनाइएको चिडियाखाना प्रमुख डा।चिरञ्जीविप्रसाद पोखरेलले जानकारी दिए ।

कोभिड–१९ का कारण गत चैत ७ गतेबाटै बन्द हुनपुगको चिडियाखाना औपचारिक रुपमा भोलि मंसिर २५ गतेबाट सञ्चालनमा आउनेछ ।