सशस्त्रमा ७ डीआईजीको पद खाली, को को गर्दैछन् बढुवाका लागि दौडधुप ?

२८ मंसिर, काठमाडौँ । सशस्त्र प्रहरी बलका ६ जना डीआईजीले अनिवार्य अवकाश पाएका छन् । ३० बर्से सेवाहदका कारण उनीहरुले आइतबारदेखि अनिवार्य अवकाश पाएका हुन् ।

अवकाश पाउनेमा डीआईजीहरू नगेन्द्र थापा, कवीन्द्रमान श्रेष्ठ, कृष्णभक्त ब्रम्हाचार्य, हरिशंकर बुढाथोकी, राजेन्द्र बस्नेत र हरिशचन्द्र अधिकारी छन् । उनीहरुसँगै उमेर हदका कारण एसएसपी राजेन्द्र शाक्यले पनि अवकाश पाएका छन् ।

नेपाली सेनाबाट स्थानान्तरण भइ आएका उनीहरुले सेनामा गरेको तालिम अवधिभरको १८ महिनालाई सेवा अवधिमा गणना नगर्न अनुरोध गर्दै गृह मन्त्रालयमा निवेदन दिएका थिए । तर, माग सुनुवाइ नभएपछि उनीहरू सबैजना स्वतः अवकाश भएका हुन् ।

सशस्त्र प्रहरीमा सातजना डीआईजीको दरबन्दी खाली छ । यसअघि सशस्त्रमा एक जना डीआईजीको दरबन्दी लामो समयदेखि रिक्त भएपनि सशस्त्र प्रहरी महानिरीक्षक शैलेन्द्र खनालले बढुवा प्रक्रिया नै रोकेर राखेका थिए । खनाल आफै एकल एआईजीमा बढुवा भएर सशस्त्रको प्रहरी महानिरीक्षक बनेका अधिकारी हुन् ।

उनीहरुको अवकाशसँगै रिक्त पदको लागि बढुवाको दौडधुप सुरु भएको छ । सात डीआईजी पद रिक्त भएसँगै सशस्त्र मुख्यालयले चाँडै बढुवा प्रक्रिया थाल्ने भएको छ । बढुवाका लागि एक दर्जन एसएसपीहरु प्रतिस्पर्धामा छन् ।

डीआईजी बढुवाका लागि एसएसपी अभिकुमार खत्री, शम्भु सुवेदी, गणेशबहादुर ठाडामगर, दुर्गाप्रसाद भट्टराई र कमल गिरी, कुलबहादुर नेम्वाङ, कालीदास धौबजी, कुमार न्यौपाने, विदुर खड्का, भेषबहादुर शाह, प्रदीपकुमार पाल, लक्ष्मणबहादुर सिंह र कृष्णराज पाठक विशेष लबिङमा लागिरहेका छन् ।

उनीहरुमध्ये खत्री, ठाडा मगर, गिरी र नेम्वाङमध्ये एकलाई भावी सशस्त्र प्रहरी महानिरीक्षक आईजीपीका रुपमा समेत हेरिएको छ ।