कोरोना महामारीमा विमानस्थलमा यात्रुको मनपरी, वायुसेवा कम्पनीको लापरवाही !

२९ मंसिर, काठमाडौं । त्रिभुवन अन्तर्राष्ट्रिय विमानस्थलमा कोरोना महामारीका बेला यात्रुले मनपरी गर्न थालेका छन् । वायुसेवा कम्पनीको लापरबाहीका कारण यात्रुहरु मास्क नलगाउने र सामाजिक दुरी समेत कायम नगरिएको पाइएको छ ।

बुद्ध एयर, यति एयरलाइन्स लगायत वायुसेवा कम्पनीले सामाजिक दुरी कायम नगर्दा विमानस्थलबाट कोरोना फैलिने जोखिम उत्तिकै बढ्दो छ । सरकारले सबै देशमा अन्तर्राष्ट्रिय उडान नखोलेका बेला आन्तरिक रुपमा यात्रा गरिरहेका यात्रुलाई समेत कोरोनाको जोखिम बढ्दो छ ।

यात्रु यात्रा गर्दा फेससील लगाउने भएपनि विमान उड्नै ढिलाई हुँदा यात्रु कक्षमा यात्रुहरु बिना मास्क समेत बस्ने गरेका छन् । स्यानिटाइजर र मास्क पर्याप्त मात्रामा वितरण नगर्दा पनि त्यत्तिकै जोखिम बढ्दो छ ।

खासगरी वायुसेवा कम्पनीले पूर्ण सुरक्षासहित यात्रु उडाउने प्रतिबद्धता जाहेर गरेपनि अहिले कोरोना महामारीमा यात्रा गर्ने यात्रुले भने त्यो कुराको महसुस गर्न सकेका छैनन् । वायुसेवा कम्पनीको लापरवाहीलाई सञ्चाउन नेपाल नागरिक उडडयन प्राधिकरणाले पनि कुनै नियमन गरेको छैन् ।