लक्ष्मी बैंकको ओरालो यात्रा कायमै, लाभांशमा ३.५ प्रतिशतको गिरावट

३० मंसिर, काठमाडौं । लक्ष्मी बैंक लिमिटेडले आर्थिक वर्ष २०७५/७६ मा भन्दा आर्थिक वर्ष २०७६/७७ मा ३.५ प्रतिशत कम लाभांश घोषणा गरेको छ ।

आ.व २०७५/७६ मा १५ प्रतिशत लाभांश वितरण गरेको बैंकले यस वर्ष भने ११.५ प्रतिशत मात्रै लाभंश वितरण गर्ने घोषणा गरेको हाे । बैंकको हिजो बसेको संचालक समितिको बैठकले उक्त लाभांश प्रस्ताव गरेको छ ।

आर्थिक वर्ष २०७६/७७ को मुनाफाबाट कुल ११.५ प्रतिशत लाभांश वितरण गर्ने प्रस्ताव गरेको हो । जसअनुसार बैंकले ८८ करोड ३१ लाख ३० हजार ३५६ रुपैयाँ बराबरको बोनस र २४ करोड ५३ लाख १३ हजार ९८८ रुपैयाँ नगद लाभांश वितरण गर्नेछ ।

बैंकले हाल कायम चुक्ता पुँजीको ९ प्रतिशत बोनस शेयर र कर प्रयोजनको लागि २.५ प्रतिशत नगद लाभांश प्रस्ताव गरेको हो । बोनसपछि बैंकको चुक्ता पूँजी १० अर्ब ६९ करोड ५६ लाख ९० हजार रुपैयाँ पुग्नेछ ।

प्रस्तावित लाभांश नियामक निकाय नेपाल राष्ट्र बैंकको स्वीकृति पश्चात बैंकको आगामी साधारण सभाले पारित गरेपछि मात्र शेयरधनीलाई वितरण गरिने छ ।