महालक्ष्मी विकास बैंकबाट ऋण लिनेहरुले पाए ब्याजमा सहुलियत

१ पुष, काठमाडौं । महालक्ष्मी विकास बैंकले कोरोनाभाइरसका कारण आफ्ना ग्राहकहरुको पेशा, व्यवसाय तथा उद्योगहरुमा पर्न गएको असरलाई मध्यनजर गर्दै ब्याजदर घटाएको छ । ऋणीहरुलाई राहत प्रदान गर्ने उद्देश्यले उक्त काम गरिएको बैंकले जनाएको छ ।

बैंकले नेपाल राष्ट्र बैंकबाट जारी भएको पुर्नकर्जा कार्यविधि अन्तरगत आवश्यक प्रबन्ध गरी लघु घरेलु तथा साना उद्यम संचालन गरिरहेका १२५० भन्दा बढी ऋणीहरुको ७२ करोड भन्दा बढी कर्जाको ब्याज दर घटाई ५ प्रतिशत कायम गरी सहुलियत प्रदान गरेको हाे ।

यसरी पुर्नकर्जा सुबिधाका लागी कोरोनाभाइरसको असर परेका उद्यमीहरुका साथै सामाजिक आर्थिक दृष्टिकोणले पिछडिएका विपन्न वर्ग, कृषक तथा महिलाहरुलाई प्राथमिकता दिएको बैंकले जनाएको छ ।

देशका शहरी तथा ग्रामीण क्षेत्रका विभिन्न स्थानहरुमा १०३ वटा शाखाहरुमार्फत सेवा प्रदान गरिरहेको महालक्ष्मी विकास बैंकका ग्राहक संख्या ५ लाख भन्दा बढी रहेको का.मु. प्रमुख कार्यकारी अधिकृत सागर शर्माले जनाकारी दिए ।