प्राइम बैंकको लाभांशमा पनि गिरावट

६ पुष, काठमाडौं । प्राइम कमर्शियल बैंक लिमिटेडले आर्थिक वर्ष २०७६/७७ को सञ्चित मुनाफाबाट शेयरधनीहरुलाई वितरण गर्ने लाभांश घोषणा गरेको छ । बैंकले शेयरधनीलाई आर्थिक वर्ष २०७३/७४ मा २७ प्रतिशत बोनस शेयर दिएको थियो । त्यस पछि लगातार आर्थिक वर्ष २०७४/७५ र आर्थिक वर्ष २०७५/७६ मा १६ प्रतिशत बोनश शेयर दिएको थियो । यस वर्ष बैंकले दिने लाभंशमा गिरावट आएको छ । बैंकले हाल कायम चुक्ता पूँजीको १५ प्रतिशतका दरले हुन आउने रकम २ अर्ब ९ करोड ७७ लाख ८७ हजार ४२५ रुपैयाँ बराबरको बोनस शेयर वितरण गर्ने घोषणा गरेको छ ।

पुस ५ गते बसेको बैंकको सञ्चालक समितिको ४११ औँ बैठकले सो दरमा लाभांश वितरण गर्ने निर्णय गरेको हो । नेपाल राष्ट्र बैंकबाट स्वीकृत भएपपश्चात आगामी वार्षिक साधारण सभाले पारित गरी सो लाभांश शेयरधनीहरुलाई वितरण गर्ने छ । हाल बैंकको चुक्ता पूँजी १३ अर्ब ९८ करोड ५२ लाख ४९ हजार ५०० रुपैयाँ छ ।