एनएमबीले पुष २९ गते बाेलायाे साधारणसभा, पुस १५ गतेसम्म शेयर खरिद गर्नेलाई लाभांश

८ पुष, काठमाडौं । एनएमबी बैंक लिमिटेडले प्रस्ताव गरेको लाभांश पारित गर्न पुस २९ गते वार्षिक साधारण सभा बोलाएको छ । बैंकले सभामा गत आर्थिक वर्षको नाफाबाट १३ प्रतिशत बोनस शेयर र कर प्रयोजनसमेत गरी ३.२० प्रतिशत नगद लाभांश वितरण गर्ने प्रस्ताव गरिसकेको छ ।

बैंकले अधिकृत पुँजी १६ अर्ब रुपैयाँबाट बढाएर २० अर्ब रुपैयाँ पुर्याउने याेजना पनि प्रस्तुत गर्ने तयारी गरेको छ । बोनस वितरणपछि चुक्ता पुँजी वृद्धि हुने भएकाले सोही अनुसार प्रबन्धपत्र तथा नियमावली संशोधन गर्ने प्रस्ताव पनि पेश हुनेछ ।

साथै, आर्थिक वर्ष २०७६/७७ को वार्षिक प्रतिवेदन, नाफा–नोक्सान हिसाब तथा नगद प्रवाह विवरणमा पनि छलफल गरी पारित गर्ने प्रस्ताव छ । सभा कृष्णटावर नयाँ वानेश्वर, काठमाडौंमा बिहान १०ः३० बजे सुरु हुनेछ । सभामा भर्चुअल माध्यमबाट पनि सहभागी हुनसक्ने गरी लगानीकर्तालाई मिटिङको आइडी र पासवर्ड प्रदान गरिने बैंकले जनाएको छ ।

सभा प्रयोजनका लागि पुस १६ बुक क्लोज हुने भएकाले पुस १५ गतेसम्म कायम रहने शेयरधनी मात्र प्रस्तावित लाभांश पाउने छन् । हाल एनएमबीको चुक्ता पुँजी १४ अर्ब ४४ करोड ७७ लाख ५२ हजार ९६६.९६ रुपैयाँ छ । प्रस्तावित बोनस वितरणपछि पुँजी १६ अर्ब ३२ करोड ५९ लाख ६० हजार ८५२.६६ रुपैयाँ पुग्नेछ ।