नियामक र बजार संचालकको कमिशन घटेन, ब्रोकर कमिशन कति घट्यो ?

१० पुष, काठमाडौं । लगानीकर्ताको लामो समयको विरोध र मागपछि ब्रोकर कमिशन घटेको छ तर नियामक र बजार सञ्चालकको कमिशन भने घटाइएको छैन । नेपाल धितोपत्र बोर्डले पाउने कमिशन र बजार सञ्चालकले लिने शुल्कमा कुनै हेरफेर नगरी बोर्डले आज एकलौटी रुपमा दोस्रो बजारमा शेयर कारोबार गर्दा लाग्ने ब्रोकर कमिशन मात्रै कटौती गरेको हो ।

बोर्डले पुष १२ गते आइतबारदेखि लागु हुनेगरी ६० प्रतिशतसम्म ब्रोकर कमिसन घटाएको हो । बोर्डले पछिल्लो समय धितोपत्र बजारमा अनलाईन कारोबारमा ८५ प्रतिशतले बढेको भन्दै ब्रोकर कमिशन घटाएको बोर्डका प्रवक्ता निरज गिरीले जारी गरेको विज्ञप्तिमा भनिएको छ ।

ब्रोकरले सानो रकमको कारोबार गर्ने साना लगानीकर्ताहरुलाई कारोबार सेवा वापत लिदै आएको न्युनतम शुल्कमा ६० प्रतिशत, सरकारी तथा संस्थागत ऋणपत्र, सामुहिक लगानी कोषको इकाई तथा अन्य धितोपत्रको खरिद तथा बिक्री कारोबारमा लिदै आएको शुल्कमा ५० प्रतिशत र संगठित संस्थाको शेयर खरिद तथा बिक्री कारोबारमा लिदै आएको शुल्कमा ३३ प्रतिशत कम हुने गरी घटाएको छ ।

लगानीकर्ताहरूले भने नियामकले लिने शुल्क समेत घटाउनु पर्ने माग गरेका थिए । सबै काम अनलाइनबाट लगानीकर्ता आफैँले गर्ने हुँदा नियामकले लिने शुल्क कटौती गर्नु पर्ने माग गरेका थिए ।