पुष २० गतेसम्म कायम शेयरधनीले एनसीसी बैंकको लाभांश र बोनस पाउने

१६ पुष, काठमाडौं । नेपाल क्रेडिट एन्ड कमर्स (एनसीसी) बैंकको पुष २० गतेसम्म कायम शेयरधनीले यस आर्थिक वर्षको बोनस तथा लाभांश पाउने भएका छन् । बैंकले पुष २१ गते बुक क्लोज गर्ने भएकाले २० गते सम्म कायम शेयरधनीले सभामा भाग लिन र प्रस्तावित लाभांश पाउनेछन् ।

बैंकले माघ ९ गते वार्षिक साधारण सभा बोलाएको छ । सभामा १०.२७ प्रतिशत बोनस शेयर र शेयरमा लाग्ने कर तिर्न ०.५४ प्रतिशत नगद लाभांश वितरण गर्ने मुख्य प्रस्ताव रहेको छ । बोनस शेयर वितरणपछि शेयर संरचना परिवर्तन हुने भएकाले सोही अनुसार प्रबन्धपत्र तथा नियमावली संशोधन गर्ने प्रस्ताव बैंकले गर्ने छ ।

गत आर्थिक वर्षको वार्षिक प्रतिवेदन नाफानोक्सान तथा नगद प्रवाह विवरण पनि पारित गर्ने प्रस्ताव छ । त्यसैगरी राष्ट्र बैंकले बैंक तथा वित्तीय संस्थालाई मर्जर वा एक्विजिशमा जान गरेको अनुरोधलाई पालना गर्दै एनसीसी बैंक अन्य कुनै बैंक तथा वित्तीय संस्थासँग मर्जर वा एक्विजिसनमा जानु परेमा सम्पूर्ण कामको अख्तियारी सञ्चालक समितिलाई दिने प्रस्ताव पनि पेश गर्ने तयारी गरेको छ ।

सभा बैंकको केन्द्रीय कार्यालय बागबजार काठमाडौंमा बिहान १० बजे डाकिएको छ । कोरोनाभाइरस महामारिका कारण भर्चुअल माध्यमबाट पनि सभामा भाग लिन सकिने बैंकले जनाएको छ ।