१८.५० प्रतिशत लाभांश पारित गर्न नेपाल इन्भेष्टमेन्ट बैंकले बोलायो बिहीबार साधारण सभा

४ माघ, काठमाडौं । नेपाल इन्भेष्टमेन्ट बैंकले माघ ८ गते वार्षिक साधारण सभा गर्ने भएको छ । बैंकले १३ प्रतिशत बोनस सेयर र ५.५० प्रतिशत नगद लाभांश पारित गर्ने मुख्य प्रस्तावसहित सभा बोलाएको हो ।

साथै, अन्य कुनै बैंक तथा वित्तीय संस्थालाई मर्ज वा एक्वायर गर्नुपरेमा सम्पूर्ण अख्तियारी सञ्चालक समितिलाई दिने प्रस्ताव पनि रहेको छ । नेपाल इन्भेष्टमेन्ट बैंकले अधिकृत पुँजी बढाएर १८ अर्ब रुपैयाँ पुर्याउने प्रस्ताव पनि पेश गर्नेछ ।

यस्तै, बोनस सेयर वितरणपछि चुक्ता पुँजी बढ्ने भएकाले सोही अनुसार प्रबन्धपत्र संशोधन गर्ने एजेन्डा पनि छ । सभा बैंकको केन्द्रीय कार्यालय दरबारमार्ग, काठमाडौंमा बिहान १० बजे सुरु हुनेछ ।

साधारण सभा गर्न बैंकले पुस २२ गतेदेखि माघ ८ गतेसम्म बुक क्लोज गरेको छ । पुस २१ गतेसम्म कायम रहने सेयरधनीले सभामा भाग लिन र प्रस्तावित लाभांश पाउनेछन् । सभामा भिडियो कन्फ्रेन्सका माध्यमबाट पनि सहभागी हुन सकिनेछ ।