सूर्या लाइफको लाभांश आज पारित हुँदै

५ माघ, काठमाडौं । सूर्या लाइफ इन्स्योरेन्स कम्पनी लिमिटेडको वार्षिक साधारण सभा आज (माघ ५ गते, सोमबार) हुँदैछ ।कम्पनीले पौष ७ गते मंगलबार बसेको सञ्चालक समितिको बैठकले गरेको निर्णय अनुसार उक्त सभा होटल ह्यारिसन प्यालेस बजरंगबली मार्ग, विराटनगरमा बिहान ११ बजेबाट सुरू हुनेछ ।

सभामा कम्पनीको कार्तिक २५ गते, मंगलबार बसेको सञ्चालक समितिको बैठकले गरेको निर्णय अनुसार आर्थिक वर्ष २०७६/७७ को मुनाफाबाट कम्पनीका शेयरधनीहरूलाई ५ प्रतिशत बोनस शेयर र ५.५२६ प्रतिशत नगद (कर प्रयोजनका लागि समेत) गरी कुल १०.५२६ प्रतिशत नगद लाभांश वितरण गर्ने प्रस्ताव पारित गरिनेछ ।

यसका साथै, सभाले कम्पनीको शेयर संरचना परिवर्तन गर्ने प्रस्ताव पनि पारित गर्नेछ । संस्थापक समूहको ७० प्रतिशत र सर्वसाधारण समुहको ३० प्रतिशत रहेको शेयर संरचनालाई परिवर्तन गरी संस्थापक समुहको ६० प्रतिशतमा र सर्वसाधारण समूहको ४० प्रतिशत कायम गर्ने प्रस्ताव पारित गरिन लागेको हो ।

त्यसैगरी, कम्पनीले साधारण सभा तथा लाभांश वितरण प्रयोजनको लागि पुस १७ गतेदेखि पुस २४ गतेसम्म शेयरधनी दर्ता पुस्तिका बन्द गरेको छ। त्यसैले, पौष १६ गतेसम्म नेप्सेमा कारोबार भई कायम शेयरधनीहरुले मात्र साधारण सभामा भाग लिन तथा लाभांश प्राप्त गर्न सक्नेछन् ।