लाइसेन्सकाे अनलाइन फाराम शुक्रबारदेखि खुल्ने

८ माघ, काठमाडौं । लाइसेन्सका लागि अनलाइन फाराम शुक्रबारदेखि खुल्ने भएको छ । यातायात व्यवस्था विभागले शुक्रबारदेखि सवारी साधन चालक अनुमतिपत्र ‘लाइसेन्स’का लागि अनलाइन फाराम खुलाउने भएको हो । सिस्टममा खराबी आएपछि विभागले अनलाइन फाराम बन्द गरेको थियो ।

शुक्रबारबाट फाराम भर्न सकिने विभागले जानकारी दिएको छ । अनलाइन फाराम सुचारु गरेसँगै यसअघि लगाइएको कोटा प्रणाली समेत हटाइएको छ । अब जतिसुकै सेवाग्राहीले पनि लाइसेन्‍सका लागि आवेदन दिन पाउने बताएको छ ।

यसअघि कोभिड(१९ को कारण देखाउँदै लाइसेन्सका लागि खुलेको आवेदनमा कोटा प्रणाली लगाइएको थियो । कोटा प्रणाली लागू गरेको भन्दै विभागको चौतर्फी आलोचना समेत भएको थियो ।

अनलाइन फाराम भर्दा एसएमएस सेवा भने तत्कालको लागि बन्द भएको छ । यो सेवा अवरूद्ध भएकाले दर्ता नम्बर सुरक्षित गरि सम्बन्धित कार्यालयसँग सम्पर्क राख्‍न विभागले जानकारी दिएको छ ।