धार्मिक पहिचानको प्रबर्द्धन गर्न ‘उत्तरबाहिनी’ भजन

११ माघ, स्याङ्जा । धार्मिक रूपमा पहिचान हुन नसकेको स्याङ्जा जिल्ला गल्याङ नगरपालिका १ मालुङ्गाको महालिंग धाम उत्तरबाहिनी क्षेत्रको धार्मिक पहिचान भएसंगै पछिल्लो समय यहाँ धर्मावलम्बीहरूको घुइँचो लाग्ने गरेको छ ।

धार्मिक ग्रन्थ अनुसार उत्तरतर्फ बगेको कालीगण्डकीको विशेष महत्त्व हुने भएतापनि पछिल्लो समयमा मात्रै यसको चर्चा हुन थालेको हो । यो ठाउँ हाल ‘उत्तरबाहिनी ‘ नामले परिचित भएको छ । यही उत्तरबाहिनीको धार्मिक महत्त्व झल्काउने गरि उत्तरबाहिनी भजन बजारमा आएको हो ।

हिन्दु धर्मको महत्व बोकेको पर्यटकको घुइँचो लाग्ने लुम्बिनी प्रदेश तथा गण्डकी प्रदेशको संगमस्थल उत्तरबाहिनीको प्रचारप्रसारको लागि बजारमा ल्याइएको भजनमा प्रेम न्यौपाने तथा तुलसी प्रभासको शब्द रहेको छ भने गायकहरु अमित सापकोटा, प्रेम न्यौपाने, खेमराज पौडेल, शिवा केसी, दामोदर भण्डारी, सीता थापा मगरले आवाज दिएका छन् ।

स्याङ्जाको मालुङ्गा र पाल्पाको हुँगीको सीमामा अवस्थित उत्तरबाहिनी क्षेत्रको महत्त्वलाई समेटेर तयार पारिएको भजनमा रिता बस्याल न्यौपानेले निर्देशन गरेकी छिन् भने उक्त भजनको व्यवस्थापकीय पाटो चैतन्यकृष्णले हेरेका छन् । भजनमा विपिन तिवारी, सञ्जु न्यौपानेसँगै कालीगण्डकी गुरुकुलका विद्यार्थीहरूको अभिनय रहेको छ ।

विगत पाँच वर्षदेखि चैतन्यकृष्णको नेतृत्वमा यस क्षेत्रलाई धार्मिक,सांस्कृतिक तथा वैज्ञानिक केन्द्र बनाउने उद्देश्यले श्री कालीगण्डकी ज्ञान–विज्ञान प्रतिष्ठानको स्थापन गराई विभिन्न कामहरू अघि बढिरहेको छ ।

देशको एक मात्र अंग्रेजी माध्यममा पठाइ हुने प्रविधियुक्त आधुनिक गुरुकुल स्थापना गरेको प्रतिष्ठानको आगामी उद्देश्य प्राकृतिक एवं आयुर्वेदिक चिकित्सा केन्द्र, योग तथा साधन केन्द्र, खोज तथा अनुसन्धान केन्द्र, धार्मिक-संस्कृतिक संग्राहलय आदिको स्थापना मार्फत् वैज्ञानिक ऋषि उत्पादन गर्ने रहेको संस्थाका अध्यक्ष चैतन्यकृष्णले जानकारी दिए ।