पिछडिएका वर्ग र समूदायलाई शिक्षा ग्रहण गर्न प्रेरणा मिलोस : मुख्यमन्त्री राउत

४ फागुन,जनकपुर । प्रदेश नं २ का मुख्यमन्त्री लालबाबु राउतले सरस्वती पूजाका अवसरमा देश र विदेशमा रहनुभएका सम्पूर्ण नेपालीमा शुभकामना व्यक्त गरेका छन् ।

वसन्त पञ्चमीको अवसरमा वैदिककालदेखि ज्ञानको ज्योतिका रुपमा सरस्वती पूजा गरी मनाइँदै आएको उल्लेख गर्दै उनले, सर्जक, साहित्य र कला क्षेत्रका साधक तथा ज्ञान अध्येताहरु आ–आफ्ना विद्यामा थप ऊर्जा प्रदान् गरून भन्ने कामनासमेत गरेका छन् ।

उनले विज्ञप्तिमा विद्याको क्षेत्रमा पछाडि परेका वर्ग र समूदायलाई शिक्षा ग्रहण गर्न प्रेरित पनि गरून् भन्ने धारणा राखेका छन् ।

त्यस्तै वसन्त ऋतुको आगमनका साथ विद्याकी अधिष्ठात्रीदेवी सरस्वतीको आज बिहानैदेखि पूजापाठ भइरहेको छ । ज्ञान, बुद्धि र विवेकका लागि श्रद्धाका साथ जनकपुरधामलगायत विभिन्न ठाउँका साथै घर–घरमा विद्यार्थीका साथै कलमजीवीहरुले ज्ञान, बुद्धि र विवेकका लागि विद्याकी देवी सरस्वतीको अपार श्रद्धाका साथ पूजापाठ गरिरहेका छन् ।

धार्मिक एवं सांस्कृतिक पर्वका रुपमा मनाइने वसन्तपञ्चमीमा सरस्वती मन्दिरका साथै विभिन्न टोलमा माटोको कलात्मकमूर्तिमा आज विधिवत् रुपमा भक्तजनले प्राण प्रतिष्ठा गरी उत्साह एवं उल्लासमय वातावरणमा पूजापाठ गरिरहेका छन् । विद्यार्थीहरुले बिहानै स्नान गरी आ–आफ्ना घरमा पुस्तक र कलमको अनिवार्य रुपमा पूजा गर्ने गर्छन् । सोही अवसरमा बुनिया, बयर , शखरखण्ड र सुन्तला अनिवार्य रुपमा प्रसादका रुपमा चढाउने गरिन्छ ।