म्यानपावरलाई शाखा कार्यालय खोल्न दिने सरकारको तयारी

५ फागुन, काठमाडौं । म्यानपावर कम्पनीहरुलाई शाखा कार्यालय विस्तारका लागि सरकारले पुनः अनुमति दिने भएको छ । वैदेशिक रोजगार विभागले म्यानपावरलाई शाखा कार्यालय खोल्न दिनेबारे व्यवसायी र सरोकारवालासँग छलफल अघि बढाएको बताएको छ ।

यसअघि पनि शाखा कार्यालय विस्तारका लागि अनुमति दिने गरिएकोमा जिल्लाहरुमा ठगी बढेको र नियमनमा समस्या भएको भन्दै शाखा खोल्न रोकिएको थियो । तर अहिले पुन खोल्नका लागि अनुमति दिन लागिएको छ । अहिलेसम्म २७ वटा म्यानपावरले शाखा कार्यालय खोल्न अनुमति पाएका छन् ।

म्यानपावर कम्पनीहरुको शाखा कार्यलय नहुदा अवैध एजेन्ट अर्थात् दलालको सक्रियता बढन थालेको र वैदेशिक रोजगारीलाई ‘ठगीको धन्दा’ बनेको भन्दै विभागले म्यानपावरहरुलाई शाखा विस्तारका लागि अनुमति दिन छलफल अघि बढाएको बताएको छ ।

वैदेशिक रोजगार ऐनमा पनि म्यानपावर कम्पनीहरुलाई शाखा कार्यालय खोल्न दिन सकिने उल्लेख छ । यसरी म्यानपावरलाई जिल्लासम्म विस्तार हुन दिदा एजेन्टबाट भइरहेको ठगी घट्ने विश्वास सरकारले लिएको छ ।