सामाजिक संजालले जीवनशैली नै परिवर्तन : सांसद यादव

१३ फागुन, वीरगन्ज । जनता समाजवादी पार्टीका केन्द्रिय सदस्य एवम संघीय सांसद प्रदीप यादवले फ्रि वाईफाई जोनको उदघाटन गरेका छन् । पर्सा जिल्लामा पहिलो पटक पुरा वडालाई लक्ष्य गरी जडान गरिएको फ्रि वाइफाई जोनको नेता यादवले बिहिबार उदघाटन गर्दै वाईफाई सुविधाको सुरुवात गरेका हुन् ।

पर्सा गढी गाउँपालिका वडा नम्बर ५ का वडा अध्यक्ष असलम आलमले जडान गरेको फ्रि वाइफाई सिस्टमको उदघाटन गर्दै सांसद यादवले सामाजिक संजालले जीवनशैलीलाई परिवर्तन गरेको बताए । उनले नेटको सुविधा हरेकको व्यक्तिको लागि अनिवार्य भएको बताउँदै वडाबासीको लागी वाइफाई सुबिधा व्यास्था गरेकोमा वडा अध्यक्ष आलमलाई धन्यवाद समेत व्यक्त गरे ।

कोरोनाको समयमा धेरै विद्यालयहरुले बाईफाई कक्षा समेत संचालन गरेकोले यसबाट शिक्षामा पनि ठुलो टेवा पुग्ने नेता यादवको भनाई रहेको थियो । उनले जडान गरिएको वाईफाईको फ्रि सुविधालाई निरन्तरता दिनुका साथै सामाजिक संजालबाट हुने विकृतिबाट युवा युवतीहरुलाई बचाउनु सबै अभिभावकको दायित्व भएकोले यसप्रति सजग रहन वडाबासीहरुलाई अनुरोध गरे ।

सो वडामा पर्ने पचरुखी,बहुअर्वा , हरदिया र जिंगना लगायतका टोलमा आजदेखि फ्रि वाईफाई सेवा संचालनमा आएको छ । उदघाटन कार्यक्रममा जनता समाजवादी पार्टी जिल्ला अध्यक्ष रामनरेश यादव, सचिव तबरेज आहमद, वडाध्यक्ष असलम आलम ,पार्टीका जिल्ला सदस्य अशोक यादव लगायतका नेता कार्यकर्ताहरुको उपस्थिति रहेको थियो ।