बढ्दो संक्रमणका कारण बिस्केट जात्रा गर्नमा रोक

२३ चैत, काठमाडौं । भक्तपुरको प्रसिद्ध बिस्केट जात्रा गर्नमा यस वर्ष पनि रोक लगाएको छ । कोरोना संक्रमण बढ्दै गएपछि संक्रमण फैलिने खतराका कारण स्थानीय प्रशासनले जात्रा गर्नमा रोक लगाएको हो

यसअघि नै स्थानीयले जात्रामा तानिने रथ भने निर्माण गरिरहेका थिए । अहिले रथ बनाउने काममा पनि रोक लगाएको छ । प्रशासनले रथको पूजा गर्न र लिंगो उठाउने दिने भएको छ भने रथ तान्नमा रोक लागाएको छ ।

प्यागोडा शैलीको तीनतले अग्लो भैरवको रथलाई सयौं व्यक्तिहरुले दुवै तिरबाट तान्नु बिस्केट जात्राको मुख्य आकर्षण हो । बिस्केट जात्रामा उपत्यकाका काठमाडौं, ललितपुर र भक्तपुरका साथै आसपासका जिल्लाका हजारौं व्यक्तिहरुको सहभागीता रहने गर्दछ ।

कोभिड–१९ को संक्रमण फैलिन गई भयावहको अवस्था सिर्जना हुन सक्ने सम्भावना रहेकाले यस वर्षको बिस्केट जात्रामा पुजारीलाई मात्र राखेर पूजा गर्ने तथा रथ तान्ने र लिंगो ठड्याउने काम गत वर्षजस्तै गर्ने प्रशासनले बताएको छ ।